మరో నాలుగు రోజుల్లో అగ్రరాజ్యంలో అధ్యక్ష ఎన్నికలు జరగనున్నాయి. అయితే ఎన్నికల రోజు కంటే ముందుగానే అమెరికన్లు తమ ఓటు హక్కును వినియోగించుకునే వెసులుబాటు ఉంటుంది. దీన్నే ఎర్లీ ఓటింగ్(ముందస్తు ఓటింగ్)గా పిలుస్తారు. గత కొన్నేళ్లుగా అమెరికాలో ఈ ఎర్లీ ఓటింగ్ పెరుగుతుండగా.. ఈసారి కొవిడ్ కారణంగా రికార్డు స్థాయిలో ముందస్తు ఓటింగ్ నమోదైంది. ఇప్పటికే 8 కోట్ల మందికి పైగా అమెరికన్లు ఓటేశారు.
మళ్లీ విజృంభిస్తోన్న కొవిడ్
అమెరికాలో కొవిడ్ వైరస్‌ మళ్లీ విజృంభిస్తోంది. దీంతో ప్రజలు ఆందోళనకు గురవుతున్నారు. ఎన్నికల రోజున గుంపులు గుంపులుగా వెళ్తే కొవిడ్ బారిన పడే ప్రమాదం ఎక్కువగా ఉందని భావిస్తున్న అమెరికన్లు ముందస్తు ఓటింగ్కే మొగ్గుచూపుతున్నారు. ఇప్పటికే 8 కోట్ల మందికి పైగా ప్రజలు పోస్టల్‌ బ్యాలెట్‌ లేదా పోలింగ్‌ కేంద్రాలకు వ్యక్తిగతంగా వెళ్లి తమ ఓటు హక్కును వినియోగించుకున్నారు. 2016 ఎన్నికల్లో నమోదైన మొత్తం ఓట్లలో 50శాతానికి పైగా ఈసారి ముందస్తు ఓటింగ్‌లోనే నమోదవడం విశేషం.
2016 అధ్యక్ష ఎన్నికల్లో మొత్తం 13.8 కోట్ల ఓట్లు పోలయ్యాయి. అందులో 4.7 కోట్ల మంది ముందస్తు ఓటింగ్‌లో పాల్గొన్నారు. కాగా.. ఈ సారి ఇప్పటికే 8 కోట్ల మందికి పైగా ఎర్లీ ఓటింగ్‌కు వెళ్లారు. అధ్యక్షుడు డొనాల్డ్‌ ట్రంప్‌.. డెమొక్రాటిక్‌ అధ్యక్ష అభ్యర్థి జో బైడెన్‌ కూడా ఇప్పటికే తమ ఓటు హక్కును వినియోగించుకున్నారు.