కరోనా వైరస్పై పోరాడే సామర్థ్యమున్న శక్తిమంతమైన యాంటీబాడీలను సేకరించే సరికొత్త విధానాన్ని శాస్త్రవేత్తలు కనుగొన్నారు. లామా అనే జంతువు నుంచి వీటిని విజయవంతంగా సేకరించారు. దీంతో కొవిడ్-19ను నివారించే, చికిత్స చేసేందుకు శ్వాస ద్వారా తీసుకోదగ్గ ఔషధాల తయారీకి మార్గం సుగుమమైందని వారు తెలిపారు.
అమెరికాలోని పిట్స్బర్గ్ విశ్వవిద్యాలయ శాస్త్రవేత్తలు ఈ పరిశోధన చేశారు. ఈ ప్రత్యేక యాంటీబాడీలు చాలా చిన్నగా ఉన్నాయి. అందువల్ల వాటిని నానోబాడీలుగా పేర్కొంటున్నారు. ఇవి మానవుల్లోని యాంటీబాడీల కన్నా చాలా చిన్నగా ఉంటాయి.
రెండు నెలల తర్వాత..
పరిశోధనలో భాగంగా లామాలోకి కరోనా వైరస్కు సంబంధించిన స్పైక్ ప్రోటీన్ను శాస్త్రవేత్తలు చొప్పించారు. రెండు నెలల తర్వాత ఆ జంతువులోని రోగ నిరోధక వ్యవస్థ... పరిపక్వ నానోబాడీలను ఉత్పత్తి చేసింది. ఇవి కరోనా వైరస్కు చాలా బలంగా అతుక్కుంటాయని గుర్తించారు. నానోగ్రాము పరిమాణంలోని నానోబాడీలను భారీగా వైరస్లను నిర్వీర్యం చేయచ్చని వివరించారు.
మానవ శరీరంలోని 10 లక్షల కణాలను కరోనా ఇన్ఫెక్షన్ బారినపడకుండా కాపాడటానికి ఈ పరిణామం ఉపయోగపడుతుందన్నారు పరిశోధకులు. సాధారణ గది ఉష్ణోగ్రత వద్ద ఇవి ఆరు వారాల పాటు స్థిరంగా ఉండగలవని తెలిపారు.
ఇదీ చదవండి:నీవూ అధ్యక్షురాలివి కావొచ్చు: కమలా హారిస్
