అమెరికా ఫేక్​ వర్సిటీ ఉచ్చులో భారతీయులు- 90 మంది అరెస్ట్​

అమెరికాలో అక్రమ వీసా ఆరోపణలతో మరో 90 మంది విద్యార్థులు అరెస్టయ్యారు. ఇమ్మిగ్రేషన్​ మోసాలకు పాల్పడుతున్న వారిని పసిగట్టేందుకు నకిలీ విశ్వవిద్యాలయం వెబ్​సైట్​ను సృష్టించిన ఫెడరల్​ బృందం ఈ విద్యార్థులను అదుపులోకి తీసుకుంది. ఇప్పటి వరకు మొత్తం 250 విద్యార్థులు అరెస్ట్​ కాగా... అందులో అధికంగా భారతీయులే ఉండటం గమనార్హం.

అమెరికాలో అక్రమ వీసాల రాకెట్​కు మరో 90 మంది విద్యార్థులు బలయ్యారు. అందులో ఎక్కువ మంది భారతీయులే ఉన్నారు. ఇమ్మిగ్రేషన్​ మోసాలకు పాల్పడుతున్న వారిని పసిగట్టేందుకు నకిలీ విశ్వవిద్యాలయ వెబ్​సైట్​ను సృష్టించిన ఫెడరల్​ బృందం... విద్యార్థులను అదుపులోకి తీసుకుంది.

భారతీయులే అధికం..

హోంలాండ్​ సెక్యూరిటీ విభాగం డెట్రాయిట్​ ప్రాంతంలో యూనివర్సిటీ ఆఫ్​ ఫార్మింగ్టన్​ పేరిట నకిలీ విశ్వవిద్యాలయం ఏర్పాటు చేసింది. అమెరికా విద్యాసంస్థల్లో అక్రమంగా ప్రవేశం పొందాలనుకునే వారికి ఈ వర్సిటీ ద్వారా ఎరవేసింది. మార్చిలో వర్సిటీని మూసివేసే నాటికి ప్రవేశం కోసం 600 మంది నమోదు చేసుకోగా... వారిలో 161 మందిని అదే నెలలో అరెస్ట్​ చేసింది అమెరికా ఇమిగ్రేషన్​, కస్టమ్స్​ ఎన్​ఫోర్స్​మెంట్​ (ఐసీఈ). తాజాగా మరో 90 మందిని అదుపులోకి తీసుకుంది.

సామాజిక మాధ్యమాల్లో దుమారం..

90 మంది విద్యార్థుల అరెస్ట్​పై వార్త వెలువడిన తర్వాత దీనిపై సామాజిక మాధ్యమాల్లో పెద్ద ఎత్తున విమర్శలు చెలరేగాయి. ఐసీఈని రద్దు చేయాలనే హ్యాష్​ట్యాగ్​తో పోస్టులు​ చేశారు నెటిజన్లు.

80 శాతం మంది..

ఇప్పటి వరకు అరెస్టయిన 250 మంది విద్యార్థుల్లో 80 శాతం మంది స్వచ్ఛందంగా దేశం విడిచి వెళ్లేందుకు ఇచ్చిన అవకాశాన్ని సద్వినియోగం చేసుకున్నట్లు ఐసీఈ ప్రతినిధి తెలిపారు. మిగతా 20 శాతం మంది విద్యార్థుల్లో సగం మందికి స్వదేశాలకు వెళ్లేందుకు అనుమతులు లభించినట్లు చెప్పారు.

బాధాకరమైన చర్య..

డెమొక్రటిక్ పార్టీ తరఫున అమెరికా అధ్యక్ష ఎన్నికల్లో పోటీ చేయాలని ఆశిస్తున్న సెనెటర్ ఎలిజబెత్ వారెన్... విద్యార్థుల అరెస్ట్​ను తప్పుపట్టారు. ఈ చర్య బాధాకరమైనది, భయంకరమైనదని ట్విట్టర్​ వేదికగా విమర్శించారు. అమెరికాలో ఉన్నత చదువులు చదవాలనుకున్న విద్యార్థుల కలలను కాలరాస్తూ.. ఐసీఈ వారిని మోసం చేసి అదుపులోకి తీసుకుందని ఆరోపించారు. విద్యార్థులను విడుదల చేయాలని డిమాండ్​ చేశారు.

సెనెటర్ ఎలిజబెత్ వారెన్ ట్వీట్​

ఇదీ చూడండి: 129 మంది భారతీయ విద్యార్థుల అరెస్ట్​