సూడాన్​ అగ్ని ప్రమాదంలో 18 మంది భారతీయులు మృతి!

సూడాన్​లో భారీ అగ్ని ప్రమాదం చోటు చేసుకుంది. సెరామిక్​ కర్మాగారంలో ఎల్​పీజీ ట్యాంకర్​ పేలడం వల్ల సంభవించిన ఈ ప్రమాదంలో 23 మంది ప్రాణాలు కోల్పోయారు. వారిలో కనీసం 18 మంది భారతీయులు ఉన్నట్లు అక్కడి భారత రాయబార కార్యాలయం తెలిపింది.

సూడాన్‌ అగ్నిప్రమాదంలో ప్రాణాలు కోల్పోయిన 23 మందిలో కనీసం 18 మంది భారతీయులు ఉన్నట్లు భారత రాయబార కార్యాలయం తెలిపింది. సుడాన్‌ రాజధాని ఖార్తూమ్‌లోని పారిశ్రామిక వాడలో ఈ అగ్నిప్రమాదం చోటు చేసుకుంది. సెరామిక్‌ ఫ్యాక్టరీలో ఎల్‌పీజీ ట్యాంకర్‌ పేలినందున 23 మంది ప్రాణాలు కోల్పోయారు. 130 మందికి గాయాలయ్యాయి.

ఈ కర్మాగారంలో 50 మందికిపైగా భారతీయులు పని చేస్తున్నట్లు సమాచారం. అధికారికంగా ప్రకటించకపోయినా...18 మంది వరకు భారతీయులు మృతి చెంది ఉంటారని భారత రాయబార కార్యాలయం తెలిపింది. మృతదేహాలు పూర్తిగా కాలిపోయినందున చనిపోయినవారి వివరాలు గుర్తించడం కష్టసాధ్యంగా మారింది. ఈ ప్రమాదంలో ఏడుగురు భారతీయులకు గాయాలు కాగా...వారిలో నలుగురి పరిస్థితి విషమంగా ఉంది. మరో 34 మంది భారతీయులు ఈ ప్రమాదం నుంచి తప్పించుకున్నారు.