హోటల్​పై దాడికి పాల్పడిన ఉగ్రవాదులు హతం

సోమాలియాలో హోటల్​పై దాడికి పాల్పడిన నలుగురు ఉగ్రవాదులను మట్టుబెట్టాయి భద్రతా దళాలు. ఐదు గంటల పాటు ఆపరేషన్​ నిర్వహించి ఉగ్రవాదుల దిగ్భంధంలో ఉన్న హోటల్​ను తమ అధీనంలోకి తెచ్చుకున్నాయి. ఈ ఘటనలో మరణించిన పౌరుల సంఖ్య 15కు పెరిగినట్లు అధికారులు తెలిపారు.

దాదాపు ఐదు గంటల పాటు సాగిన ఆపరేషన్​ అనంతరం ఉగ్రవాదుల దిగ్భంధంలో ఉన్న హోటల్​ను తమ అధీనంలోకి తెచ్చుకున్నారు సోమాలియా భద్రతా సిబ్బంది. హోటల్​లోకి చొరబడిన నలుగురు ముష్కరులను హతమార్చారు. పదుల సంఖ్యలో పౌరులను కాపాడారు. ఈ ఘటనలో మరణించిన వారి సంఖ్య 15కు పెరిగినట్లు సోమాలియా సమాచార శాఖ అధికార ప్రతినిధి ఇస్మాయిల్ ముఖ్తార్ వెల్లడించారు.

ఇదీ జరిగింది.

సోమాలియా రాజధాని మొగదిషులో బీచ్ పక్కన ఉన్న ప్రముఖ ఎలైట్​ హోటల్​పై ఆదివారం మధ్యాహ్నం దాడికి తెగబెడ్డారు ఉగ్రవాదులు. సెక్యూరిటీ గేట్లను కారు బాంబుతో ధ్వంసం చేసి లోపలకు చొరబడ్డారు. ప్రశాంతంగా బస చేస్తున్న అమాయకులపై తూటాల వర్షం కురిపించారు. హోటల్​ను దిగ్బంధించారు.

తొలుత ఈ ఘటనలో 10 మంది పౌరులు మరణించినట్లు చెప్పారు పోలీసులు. ఆపరేషన్​ పూర్తయిన అనంతరం మృతుల సంఖ్య 15కు పెరిగినట్లు తెలిపారు. మొత్తం 20మందికిపైగా గాయపడ్డారని చెప్పారు.

గత కొద్ది నెలలుగా ప్రశాంతంగా ఉన్న సోమాలియా ఈ ఘటనతో మళ్లీ ఉలిక్కిపడింది. హోటల్​పై దాడికి తామే పాల్పడినట్లు ఇస్లామిక్ అతివాద​ రెబల్స్​, అల్​ఖైదా అనుబంధ అల్​ షబాబ్​ ప్రకటించింది.