భారత్​ నుంచి దక్షిణాఫ్రికాకు 15 లక్షల ​డోసులు!

దక్షిణాఫ్రికాకు 15లక్షల కొవిడ్​ టీకా డోసులను భారత్​ సరఫరా చేయనున్నట్లు తెలుస్తోంది. సీరం సంస్థ తయారు చేస్తోన్న టీకాలను రెండు దశల్లో పంపిణీ చేయనున్నట్లు తెలిపారు ఆ దేశ ఆరోగ్యమంత్రి జ్వేలి ఎమ్​ఖైజ్​.

ఆక్స్‌ఫర్డ్‌ విశ్వవిద్యాలయ సౌజన్యంతో భారత్​ సీరం సంస్థ తయారు చేస్తున్న కరోనా టీకా డోసులను దక్షిణాఫ్రికాకు సరఫరా చేయనున్నట్లు తెలుస్తోంది. రెండు దశల్లో 15 లక్షల డోసులను భారత్​ పంపిణీ చేయనున్నట్లు ఆ దేశ ఆరోగ్య మంత్రి జ్వేలి ఎమ్​ఖైజ్​ వెల్లడించారు. జనవరిలో 10 లక్షల డోసులు.. ఫిబ్రవరిలో అదనంగా 5 లక్షల వ్యాక్సిన్లు సీరం అందిస్తోందని పేర్కొన్నారు.

దేశంలో ఆరోగ్య పరిస్థితులపై పార్లమెంటు పోర్ట్‌ఫోలియో కమిటీని ఉద్దేశించి మాట్లాడిని ఆయన.. దిగుమతి చేసుకున్న టీకాలను ముందుగా ఫ్రంట్‌లైన్​ వైద్య సిబ్బందికి వేస్తామని వెల్లడించారు.

సమయానికి చెల్లింపులు చేయడంలో నిర్లక్ష్యం వల్లే టీకాలు సేకరించడంలో విఫలమైనట్లు ప్రభుత్వంపై తీవ్ర ఆరోపణలు వచ్చాయి. ఈ నేపథ్యంలో భారత్​ టీకాలు అందిస్తోందని ప్రకటించారు ఎమ్​ఖైజ్​. భారత టీకా సరఫరా గురించి ఇంకా చర్చలు జరుగుతున్నాయని తెలిపారు.

ఇదీ చూడండి:హత్య కేసులో ట్రంప్​పై అరెస్ట్​ వారెంట్​