చర్చిలో తొక్కిసలాట.. 20మంది మృతి

టాంజానియాలోని ఓ చర్చిలో జరిగిన తొక్కిసలాటలో 20మంది మృతి చెందగా, సుమారు 16మందికి గాయాలైనట్లు సమాచారం. భక్తులకు అవసరమైన ఏర్పాట్లు చేయకుండా కార్యక్రమం నిర్వహించిన బాధ్యులకోసం ప్రస్తుతం పోలీసులు గాలిస్తున్నారు.

టాంజానియా మోషి పట్టణంలోని ఓ చర్చిలో అపశ్రుతి చోటుచేసుకుంది. ప్రత్యేక ప్రార్థనల సందర్భంగా నేలపై పోసిన పవిత్ర తైలాన్ని తాకేందుకు భక్తులు ఎగబడిన నేపథ్యంలో జరిగిన తొక్కిసలాటలో 20మంది మరణించగా, 16 మందికి గాయాలయ్యాయని సమచారం. ఈ ఘటనలో మృతుల సంఖ్య మరింత పెరిగే అవకాశం ఉందని జిల్లా కమిషనర్ కిప్పి వారియోబా తెలిపారు.

మోషి పట్టణంలో ఏర్పాటు చేసిన ప్రత్యేక ప్రార్థనలకు ప్రముఖ క్రైస్తవ మత బోధకుడు ఫాదర్ బోనిఫేస్ మ్వాంపోసా హాజరయ్యారు. ఈ సందర్భంగా అధిక సంఖ్యలో భక్తులు ప్రార్థనల్లో పాల్గొన్నారు. ఈ నేపథ్యంలో ప్రార్థన సమయంలో పవిత్రతైలాన్ని నేలపై పోశారు నిర్వాహకులు. దీనిని తాకితే అనారోగ్య సమస్యలు నయమవుతాయని భావించిన భక్తులు.. పవిత్ర తైలాన్ని తాకేందుకు ఎగబడ్డారు. ఈ నేపథ్యంలో తొక్కిసలాట జరిగి 20మంది ప్రాణాలు కోల్పోయారు. ఘటనకు కారణమైన బోధకుడు మ్వాంపోసా కోసం పోలీసులు గాలింపు చర్యలు చేపట్టారు.