దక్షిణ సూడాన్‌లోని లేక్స్ రాష్ట్రంలో జరిగిన మత ఘర్షణల్లో 13 మంది మృతి చెందారు. మరో 16 మంది తీవ్రంగా గాయపడినట్లు పోలీసులు వెల్లడించారు. గోనీ, థియెత్ వర్గాల మధ్య మొదలైన ఈ గొడవల కారణంగా తలెత్తిన శాంతిభద్రతల సమస్యను పునరుద్ధరించేందుకు సైన్యాన్ని మోహరించినట్లు రాష్ట్ర పోలీసు విభాగం తెలిపింది.
"రెండు వర్గాల మధ్య శనివారం ఉదయం ఘర్షణలు మొదలయ్యాయి. ఈ ఘటనలో 13 మంది మరణించారు, 16 మంది గాయపడ్డారు. భద్రతా దళాల మోహరింపు అనతరం పరిస్థితిని అదుపులోకి వచ్చింది. ఈ రెండు వర్గాలు దశాబ్ద కాలంగా ఘర్షణ పడుతున్నాయి."
-ఎలిజా మాబోర్ మకువాచ్, పోలీసు అధికార ప్రతినిధి
పశువులపై దాడులు, పగ, పరస్పర హత్యల ద్వారా ఈ రెండు వర్గాలు తరచుగా హింసకు పాల్పడుతుంటాయి. ఇక ఈ ప్రాంతంలో అక్రమ తుపాకులు సమస్య అధికం. తరచూ అమాయక ప్రజలు, సైనికుల ప్రాణనష్టానికి ఇదీ ఓ కారణం. పౌరుల నుంచి ఆయుధాలను దూరం చేసేందుకు అధికారులు చేసిన ప్రయత్నాలు విఫలమయ్యాయి.