అమెరికా-కెన్యా సంయుక్త సైనిక స్థావరాలపై ఉగ్రదాడి

సోమాలియాకు చెందిన అల్​ షబాబ్ ఉగ్ర సంస్థ కెన్యాలోని అమెరికా-కెన్యా సంయుక్త సైనిక స్థావరంపై దాడికి పాల్పడింది. లాము తీరంలో ఈ దాడి జరిగినట్లు అధికారులు వెల్లడించారు. దాడిని దీటుగా తిప్పికొట్టినట్లు స్పష్టం చేశారు.

సోమాలియాకు చెందిన జిహాదీ తీవ్రవాదులు కెన్యాలో దాడికి పాల్పడ్డారు. లాము తీరంలోని అమెరికా, కెన్యా సంయుక్త సైనిక స్థావరంపై ముష్కరులు దాడికి పాల్పడినట్లు ప్రభుత్వ అధికారులు స్పష్టం చేశారు. సింబా క్యాంప్​ వద్ద తెల్లవారుజామున ఈ దాడి జరిగినట్లు తెలిపారు. దాడిని దీటుగా తిప్పికొట్టినట్లు వెల్లడించారు.

దాడి చేసింది తామేనని అల్​ షబాబ్ సంస్థ ప్రకటించింది. 'కట్టుదిట్టమైన భద్రత ఉన్న సైనిక స్థావరాన్ని విజయవంతంగా ధ్వంసం చేసి స్థావరంలోని ఓ భాగాన్ని అధీనంలోకి తీసుకున్నాం' అని ఓ ప్రకటనలో తెలిపింది. కెన్యా, అమెరికాకు చెందిన సైనికులు మరణించినట్లు పేర్కొంది. అయితే ఈ విషయాన్ని అధికారులు ధ్రువీకరించలేదు.

'అల్​ఖుదూస్​(జేరుసలేం)ను ఎప్పటికీ యూదులుగా మార్చలేరు' అన్న విధానానికి కట్టుబడి ఈ దాడులకు పాల్పడినట్లు తెలుస్తోంది. ఈ పేరుతో ఇదివరకే పలు దాడులకు పాల్పడింది అల్​ షబాబ్.

ఇదీ చదవండి: తొమ్మిదేళ్ల సిరియా యుద్ధంలో అంతులేని నరమేధం