పాన్‌ ఇండియా మూవీగా బాక్సాఫీస్‌ వద్ద రికార్డులను తిరగరాస్తోంది 'కేజీఎఫ్2'. ఇప్పటికే రూ.1000కోట్ల కలెక్షన్లు దాటి 'ఆర్ఆర్ఆర్‌'ను దాదాపు బీట్‌ చేసేసింది. సినిమా విడుదలై నెల రోజులు అయినా ఇప్పటికీ బాలీవుడ్‌లో రాఖీభాయ్‌కు ఏమాత్రం క్రేజ్‌ తగ్గలేదు. ఈ క్రమంలో 'కేజీఎఫ్' అభిమానులకు మరో తీపి కబురు. ఈ ఏడాదిలోనే ‘కేజీఎఫ్3’ షూటింగ్ మొదలు పెట్టనున్నట్లు నిర్మాత విజయ్‌ కిరంగదూర్‌ తెలిపారు. 'మార్వెల్‌ యూనివర్స్‌' తరహాలో 'కేజీఎఫ్3ని ప్లాన్‌ చేస్తున్నట్లు చెప్పారు. తాజాగా ఓ ఆంగ్ల పత్రికకు ఇచ్చిన ఇంటర్వ్యూలో అనేక ఆసక్తికర విషయాలు పంచుకున్నారు.
"ప్రస్తుతం దర్శకుడు ప్రశాంత్ నీల్‌ 'సలార్' ప్రాజెక్టులో బిజీగా ఉన్నారు. దాదాపు 30-35శాతం షూటింగ్ పూర్తయింది. వచ్చే వారం మొదలయ్యే తర్వాతి షెడ్యూల్‌లో సింహభాగం షూటింగ్ పూర్తి చేస్తాం. అక్టోబరు లేదా నవంబరు నాటికి సినిమా పూర్తవుతుంది. ఈ క్రమంలో ‘కేజీఎఫ్3’ను అక్టోబరు నుంచి మొదలు పెట్టాలని ప్రణాళిక సిద్ధం చేస్తున్నాం. ప్రీప్రొడక్షన్‌ వర్క్‌, షూటింగ్ ఇలా మొత్తం పూర్తవడానికి ఏడాది పైనే పడుతుంది. 2024లో ‘కేజీఎఫ్3’ ని విడుదల చేయాలని భావిస్తున్నాం" అని విజయ్‌ కిరంగదూర్‌ తెలిపారు.
" 'కేజీఎఫ్3'ను మార్వెల్‌ యూనివర్స్‌ తరహాలో డిజైన్‌ చేసుకున్నాం. అంటే వివిధ చిత్రాల్లోని హీరోలు ఇందులో భాగస్వాములు అవుతారు. అంటే డాక్టర్‌ స్ట్రేంజ్‌, స్పైడర్‌ మ్యాన్‌ ఇలా ఆ పాత్రలన్నీ ఒక సినిమాలో కలిసినట్లే ఇందులోనూ వేర్వేరు సినిమాల్లో ఉన్న హీరోలు కలుస్తారు. దాని వల్ల మేము ప్రేక్షకులను చేరే పరిధి మరింత విస్తృతమవుతుంది" అని చెప్పుకొచ్చారు.