KGF 2 movie Effects Pushpa 2 movie: ప్రస్తుతం భారతీయ సినిమాకు కేరాఫ్‌ అడ్రస్‌గా దక్షిణాది చిత్రాలు నిలుస్తున్నాయి. మేకింగ్‌, టేకింగ్‌, యాక్టింగ్‌ ఇలా ఏదైనా సరే ఈ చిత్రాలదే హవా. హిందీలోనూ 'కేజీయఫ్2' దూసుకుపోతోంది. రాఖీభాయ్‌ రికార్డుల మీద రికార్డులు సృష్టిస్తున్నాడు. ఇప్పుడు ఈ చిత్ర ప్రభావం రాబోయే సినిమాలపై పడనుందా? అంటే అవుననే అంటున్నాయి చిత్ర వర్గాలు. ముఖ్యంగా రాబోయే సీక్వెల్స్‌పై దీని ప్రభావం చూపనుంది.
'కేజీయఫ్: చాప్టర్‌1'కు కొనసాగింపుగా 'కేజీయఫ్2' ప్రేక్షకుల ముందుకు వచ్చిన సంగతి తెలిసిందే. తొలి అధ్యాయంతో పోలిస్తే రెండో భాగంలో కథ, హీరో ఎలివేషన్స్‌ ఓ రేంజ్‌లో ఉన్నాయి. 'హీరో పాత్ర తగ్గిపోతోంది' అన్నప్పుడల్లా సడెన్‌గా ఓ ఎలివేషన్‌ సీన్‌ రావడం మళ్లీ ఆ పాత్ర తారస్థాయికి చేరడం ఇలా సినిమా మొత్తం సాగింది. ఇప్పుడు సీక్వెల్స్‌ తీసుకున్న దర్శకులకు 'కేజీయఫ్2' కొత్త తలనొప్పి తెచ్చింది. తొలి భాగంతో పోలిస్తే రెండో భాగం ఏమాత్రం డౌన్‌ అయినా ప్రేక్షకుడు జీర్ణించుకోలేడు. ఆ సినిమాకు ఈ సినిమాకూ మొదటి పార్ట్‌, రెండో పార్ట్‌ ఇలా ఉందంటూ చర్చలు మొదలవుతాయి. తెలుగులోకి వచ్చే సరికి 'కేజీయఫ్' మాదిరిగానే అల్లు అర్జున్‌ 'పుష్ప' రెండో భాగం ప్రేక్షకుల ముందుకు రానుంది. తొలి భాగంలో హీరో పాత్ర ఒక్కో మెట్టు ఎక్కుతూ ఎర్రచందనం సిండికేట్‌ను శాసించే స్థాయికి చేరుకొంటుంది. ఇక ఈ స్థాయిని దాటి పుష్పరాజ్‌ సిండికేట్‌ను ఎలా రూల్‌ చేశాడో 'పుష్ప: ది రూల్‌'లో చూపించనున్నారు. మరి రాఖీభాయ్‌కు పాత్రను చూపించినట్లే ఫుల్ ఎలివేషన్స్‌తో 'పుష్ప రాజ్‌' పాత్ర ఉంటుందా? ఎర్రచందనం సిండికేట్‌ను ఎలా నడిపించాడు? భన్వర్‌ సింగ్‌ షెకావత్‌, మంగళం శ్రీనులను ఎదుర్కొన్నాడు? ప్రస్తుతం ప్రేక్షకులను తొలిచేస్తున్న ప్రశ్నలివే. చిత్ర బృందం కూడా అభిమానుల అంచనాలను అందుకునేలా సన్నివేశాలను రాసుకుంటోందని సమాచారం.