Vishal CBFC Allegations : విశాల్​ ఆరోపణలపై స్పందించిన కేంద్రం.. 'ముంబయికి అతన్ని పంపించాం'

Vishal CBFC Allegations : సెన్సార్ బోర్డు కార్యాలయంలో అవినీతి పేరుకుపోయిందంటూ నటుడు విశాల్ చేసిన ఆరోపణలపై కేంద్ర సమాచార, ప్రసార శాఖ తాజాగా స్పందించింది. ఇంతకీ ఏమైందంటే ?

Vishal CBFC Allegations :ముంబయి సెన్సార్ బోర్డు కార్యాలయంలో అవినీతి పేరుకుపోయిందంటూ నటుడు విశాల్ చేసిన సంచలన ఆరోపణలపై కేంద్ర సమాచార, ప్రసార శాఖ తాజాగా స్పందించింది. ఈ విషయం చాలా దురదృష్టకరమని పేర్కొంది.

"సీబీఎఫ్‌సీలో జరిగిన అవినీతిపై నటుడు విశాల్ బయటపెట్టిన అంశం చాలా దురదృష్టకరమని మేము భావిస్తున్నాం. ఈ విషయంపై విచారణ జరిపేందుకు సమాచార, ప్రసార మంత్రిత్వ శాఖ నుంచి ఒక సీనియర్ అధికారిని ఈ రోజు ముంబయికి పంపాం. ప్రతి ఒక్కరూ మంత్రిత్వ శాఖకు సహకరించవలసిందిగా విజ్ఞప్తి చేస్తున్నాం. CBFC వేధింపులకు సంబంధించిన ఏదైనా విషయాలను గురించి సమాచారాన్ని తెలిపేందుకు jsfilms.inb@nic.inను ఉపయోగించుకోవల్సిందిగా కోరుతున్నాము". అని సమాచార మంత్రిత్వ శాఖ ట్విట్టర్​ వేదికగా తెలిపింది.

'ఆ ఇద్దరూ CBFC వ్యక్తులు కారు'..
మరోవైపు ఇదే విషయంపై దర్శకుడు అశోక్ పండిట్​ కూడా స్పందించారు. విశాల్​ పేర్కొన్న ఆ ఇద్దరూ CBFC ఉద్యోగులు కారని ఆయన చెప్పుకొచ్చారు. అంతే కాకుండా విశాల్​ చేస్తున్న ఆరోపణల తీవ్రత ఎక్కువగా ఉన్నందున.. ఈ విషయంపై సీబీఐ విచారణ చేపట్టాలని డిమాండ్​ చేశారు.

"విశాల్​ తన స్టేట్‌మెంట్‌లో ఎం రాజన్, జిజా రాందాస్ అనే ఇద్దరి పేర్లను ప్రస్తావించారు. నాకు తెలిసినంత వరకు వీరిద్దరూ CBFC ఉద్యోగులు కాదు. అటువంటప్పుడు ఈ విషయం గురించి సీబీఎఫ్‌సీ అధికారిని నిందించడం సరికాదు. కానీ మీరు చేసిన ఆరోపణలు చాలా సీరియస్‌గా ఉన్నందున.. ఈ విషయంపై మేము సీబీఐ విచారణ చేపట్టాలని డిమాండ్ చేస్తున్నాం. డబ్బులు డిమాండ్ చేసిన ఏ అధికారి కూడా నేరుగా అతని ఖాతాలోకి డబ్బులు వేయమని అడిగి ఉండడు. అయితే ఆయన పేర్కొన్న ఆ ఇద్దరు వ్యక్తులు ఎవరైనా CBFC వ్యక్తుల తరఫున డబ్బులు తీసుకున్నారా అన్న విషయాన్ని వారిని అడిగే తెలుసుకోవాలి. దీని పై కచ్చితంగా హై పవర్ విచారణ చేపట్టాల్సిందే." అని అశోక్​ అన్నారు.

అసలేం జరిగిందంటే :
Vishal Censor Board : కోలీవుడ్ హీరో విశాల్​ తాజాగా సంచలన వ్యాఖ్యలు చేశారు. సినిమాలకు సెన్సార్‌ జారీ చేసే సెంట్రల్‌ బోర్డు ఆఫ్‌ ఫిల్మ్‌ సర్టిఫికేషన్‌(Central Board of Film Certification) కార్యాలయంలోనూ అవినీతి పేరుకుపోయిందని ఆయన ఆరోపణలు చేశారు. తన లేటెస్ట్​ మూవీ 'మార్క్‌ ఆంటోని' విషయంలో తనకు ఎదురైన సమస్య గురించి మాట్లాడిన ఆయన ఈ మేరకు సెన్సేషనల్​ కామెంట్స్​ చేశారు. సామాజిక మాధ్యమం ఎక్స్‌ వేదికగా ఈ పోస్ట్​తో తన ఆవేదన వ్యక్తం చేశారు.