Vijay Devarakonda Samantha Surprise: యువ నటుడు విజయ్ దేవరకొండ.. సమంతకు ఎప్పటికీ మరిచిపోలేని సర్ప్రైజ్ ఇచ్చాడు. తాము నటిస్తున్న సినిమా స్రిప్టులో లేని సన్నివేశాన్ని చెప్పించి కంటతడి పెట్టేలా చేశాడు. శివ నిర్వాణ దర్శకత్వంలో ఈ ఇద్దరు నటిస్తున్న సంగతి తెలిసిందే. కశ్మీర్‌లో ఈ సినిమా చిత్రీకరణ ఇటీవల ప్రారంభమైంది. ఆ సెట్స్‌లోనే విజయ్ తన సృజనాత్మకతను బయటపెట్టారు.
ఏప్రిల్‌ 28 సమంత పుట్టినరోజును పురస్కరించుకుని చిత్ర దర్శకుడితో ఓ ఫేక్ సీన్‌ రాయించాడు. ఈ విషయం తెలియని సమంత సన్నివేశంలో లీనమై, భావోద్వేగానికి గురైంది. "ఎందుకిలా ఉన్నావ్‌? నేను వెళ్లిపోతున్నందుకా? పది రోజుల్లో వచ్చేస్తా. నువ్వు మా ఊరొచ్చి మా తల్లిదండ్రులతో మాట్లాడటం కాదు.. నేనే మీ వాళ్లతో మాట్లాడి మన పెళ్లికి ఒప్పిస్తా" అంటూ సమంత ఫీల్‌ అవుతుండగా విజయ్ 'హ్యాపీ బర్త్‌డే' అని ఆమెను ఆశ్చర్యంలో పడేశారు. తర్వాత దర్శకుడు, సాంకేతిక నిపుణులు కేకును తీసుకొచ్చి, సమంతతో కట్‌ చేయించారు. ఈ సర్ప్రైజ్ వీడియో ప్రస్తుతం నెట్టింట సందడి చేస్తోంది.
ఇంకా టైటిల్‌ ఖరారుకాని ఈ సినిమా 'వీడీ 11' వర్కింగ్‌ టైటిల్‌తో షూటింగ్‌ జరుపుకుంటోంది. ఈ ప్రాజెక్టును మైత్రీ మూవీ మేకర్స్‌ సంస్థ నిర్మిస్తోంది. రొమాటింక్‌ డ్రామాగా రూపొందుతున్న ఈ చిత్రంలో వెన్నెల కిషోర్‌, రాహుల్‌ రామకృష్ణ తదితరులు కీలక పాత్రలు పోషిస్తున్నారు. ఈ సినిమాకి హిషామ్‌ అబ్దుల్‌ వాహబ్‌ స్వరాలు సమకూరుస్తున్నారు. ప్రవీణ్‌ పూడి ఎడిటర్‌గా.. జి.మురళి ఛాయాగ్రాహకుడిగా వ్యవహరిస్తున్నారు.