Vijay Devarakonda Rashmika Maldives Tour: 'గీతగోవిందం', 'డియర్‌ కామ్రేడ్‌'తో ఆన్‌స్క్రీన్‌ లవ్లీ పెయిర్‌గా గుర్తింపు తెచ్చుకున్నారు టాలీవుడ్‌ జంట విజయ్ దేవరకొండ, రష్మిక. వరుస సినిమా షూటింగ్స్‌తో కెరీర్‌లో ఫుల్‌ బిజీగా ఉన్న ఈ జోడీ వర్క్ లైఫ్‌ నుంచి కాస్త విరామం తీసుకున్నట్లు తెలుస్తోంది. ఈ మేరకు వీరిద్దరూ విదేశాలకు పయనమైన పలు వీడియోలు ఇప్పుడు నెట్టింట అందరి దృష్టిని ఆకర్షిస్తున్నాయి.
'లైగర్‌' పరాజయం తర్వాత విజయ్ దేవరకొండ తన తదుపరి చిత్రం 'ఖుషి'పై దృష్టి సారించారు. ఈ సినిమాతో అభిమానులను అలరించడం కోసం ఆయన శ్రమిస్తున్నారు. మరోవైపు, 'పుష్ప'తో దేశవ్యాప్తంగా క్రేజ్‌ సొంతం చేసుకున్న రష్మిక బాలీవుడ్‌లో వరుస ప్రాజెక్ట్‌లు ఓకే చేశారు. అమితాబ్‌తో కలిసి ఆమె కీలకపాత్రలో నటించిన 'గుడ్‌బై' శుక్రవారం ప్రేక్షకుల ముందుకు వచ్చి మంచి టాక్‌ అందుకుంది.