సీనియర్ హీరో విక్టరీ వెంకటేశ్ నటిస్తున్న కొత్త చిత్రం 'సైంధవ్‌'. వెంకీ కెరీర్‌లోనే అత్యంత భారీ బడ్జెట్‌తో ఈ ప్రాజెక్ట్ నిర్మితమవుతున్నది. ఇది ఆయనకు తొలి పాన్ ఇండియా సినిమా కావడం విశేషం. పూర్తిగా యాక్షన్‌ ఎంటర్టైనర్గా రూపొందనుంది. శైలేష్‌ కొలను దర్శకుడిగా వ్యవహరిస్తున్న ఈ సినిమాకు వెంకట్‌ బోయనపల్లి నిర్మాతగా వ్యవహరిస్తున్నారు. నవాజుద్దీన్‌ సిద్ధిఖీ కీలక పాత్రలో కనిపించనున్నారు. ఇప్పటికే విడుదలైన ఈ సినిమా గ్లింప్స్ సినీ ప్రియులను బాగా ఆకట్టుకుంది. ఈ సినిమా రెగ్యులర్‌ షూటింగ్ త్వరలోనే ప్రారంభంకానుంది.
ఈ నేపథ్యంలో హీరోయిన్స్ ఎంపికపై దృష్టి పెట్టింది మూవీటీమ్. అయితే తాజాగా అందిన సమాచారం ప్రకారం ఈ చిత్రంలో ముగ్గురు కథానాయికలు ఉండే అవకాశముందని తెలుస్తోంది. అందులోనూ ఈ చిత్రం పాన్ ఇండియా కావడం వల్ల ఓ బాలీవుడ్ ముద్దుగుమ్మను తీసుకోవాలని భావిస్తున్నారట. అలాగే మరో ఇద్దరిని సౌత్ ఇండస్ట్రీ నుంచి తీసుకోవాలని సన్నాహాలు చేస్తున్నారని తెలిసింది. ప్రస్తుతం దీనిపై చర్చలు జరుగుతున్నాయట. ఈ మూడు రోల్స్కు స్టోరీలో ఎంతో ప్రాధాన్యత ఉంటుందని.. అలాగని ఇందులో ఏ పాత్ర కూడా వెంకీకి జోడీగా కనిపించదని కూడా సినీ వర్గాల సమాచారం. ఇకపోతే ఈ సినిమాకి సంతోష్‌ నారాయణన్‌ సంగీతం సమకూరుస్తున్నారు. గ్యారీ బిహెచ్‌-కూర్పు, ఎస్‌.మణికందన్‌ ఛాయాగ్రహణం అందిస్తున్నారు.