Unstoppable with NBK talk show: "అనిపించింది అందాం.. అనుకున్నది చేద్దాం.. ఎవరు ఆపుతారో చూద్దాం" అంటూ నందమూరి నటసింహం బాలకృష్ణ... తొలిసారిగా వ్యాఖ్యాతగా వ్యవహరించిన సెలబ్రిటీ టాక్ షో 'అన్ స్టాపబుల్ విత్ ఎన్బీకే'. 'ఆహా' ఓటీటీ వేదికగా ప్రసారమైన ఈ కార్యక్రమం 'మోస్ట్‌ వాచ్డ్‌ షో'గా అద్భుతమైన ప్రేక్షకాదరణ పొందింది. టాక్ షోలలో నెం.1గా నిలిచింది. కార్యక్రమంలో పాల్గొన్న తారల ముచ్చట్ల కన్నా.. బాలయ్య సందడే ప్రేక్షకుల్ని విపరీతంగా అలరించింది. సెలబ్రిటీలతో బాలయ్య సరదా సంభాషణలకు, టైమింగ్‌కి ఆయన అభిమానులతోపాటు సామాన్య ప్రేక్షకులు కూడా ఫిదా అయిపోయారు. దీంతో బాలయ్య హోస్ట్గా సూపర్ క్రేజ్ సంపాదించుకున్నారు. అయితే ఈ షో తొలి సీజన్ పూర్తయినప్పటి నుంచి రెండో సీజన్ ఎప్పుడెప్పుడు ప్రారంభమవుతుందా అని ప్రేక్షకులు ఎంతో ఆసక్తిగా ఎదురుచూశారు.
అయితే తాజాగా ఈ రెండో సీజన్ ప్రారంభంపై అప్డేట్ ఇచ్చింది ఆహా. తెలుగు ఇండియన్ ఐడల్లో బాలయ్య అన్స్టాపబుల్ గురించి మాట్లాడుతూ.. "మధుర క్షణాలకు ముగింపు ఉండదు.. కొనసాగింపే" అంటూ అన్నారు. తాజాగా ఆ వీడియోను ఆహా షేర్ చేసింది. "మీ ఫెవరెట్, ఇండియాస్ నెం.1టాక్ షో రెండో సీజన్ త్వరలోనే ప్రారంభంకానుంది. గెస్టులుగా ఎవరిని ఆహ్వానిద్దాం?" అంటూ వ్యాఖ్య రాసుకొచ్చింది. ఆగస్టు 15న షోకు సంబంధించిన వివరాలను తెలియజేస్తామని చెప్పింది. దీంతో బాలయ్య ఫ్యాన్స్ తెగ సంబరపడిపోతున్నారు.