ఇటీవలై లైగర్తో పరాజయాన్ని అందుకున్న టాలీవుడ్ రౌడీహీరో విజయ్ దేవరకొండ తన కొత్త సినిమాతో ఎలాగైనా హిట్ కొట్టాలని పట్టుదలతో ఉన్నారు. అయితే ప్రస్తుతం ఈ యంగ్‌ హీరోకు సంబంధించి ఓ వార్త నెట్టింట చక్కర్లు కొడుతోంది. విజయ్ దేవరకొండకు మాటల మాంత్రికుడు త్రివిక్రమ్ ఒక స్టోరీ లైన్‌ వినిపించారట. అది ఈ రౌడీ హీరోకి తెగ నచ్చేసిందట. కానీ కొన్ని కారణాల వల్ల ఈ మూవీ ఇప్పటి వరకు పట్టాలెక్కలేదు.
అయితే త్వరలోనే త్రివిక్రమ్ ఈ సినిమా మొదలుపెట్టడానికి సన్నాహాలు చేస్తున్నారని, శశి కిరణ్‌ తిక్క ఈ చిత్రానికి దర్శకత్వం వహించనున్నారని ఫిల్మింనగర్‌ టాక్‌. కానీ విజయ్ మాత్రం త్రివిక్రమ్ దర్శకత్వం వహిస్తేనే ఈ ప్రాజెక్టు చేయడానికి ఆసక్తి చూపుతున్నారని సమాచారం. ప్రస్తుతం విజయ్ శివ నిర్వాణ దర్శకత్వంలో 'ఖుషి'లో నటిస్తున్నారు. ఈ సినిమాలో విజయ్ సరసన స్టార్ హీరోయిన్ సమంత నటిస్తోంది. ప్రేమకథా చిత్రంగా ప్రేక్షకుల ముందుకురానున్న ఈ సినిమాపై ఇప్పటికే అభిమానులు భారీస్థాయిలో అంచనాలు పెట్టుకున్నారు.