Tollywood Heroes as Government Officers: సినీ ప్రేక్షకులను, అభిమానులను అలరించడానికి అగ్ర తారలు సైతం కొత్త రకమైన ప్రయత్నాలపై మొగ్గు చూపుతున్న రోజులివి. తమ మార్క్‌ అంశాలతోపాటు.. కథల్లో, తమ పాత్రల్లో ఇంకేదో నవ నేపథ్యం ఉండాలని తపిస్తున్నారు. అవసరమైతే జానర్‌లు మార్చాలని, భిన్నమైన పాత్రలు భుజానికెత్తుకోవాలని, సాహసాలకు సిద్ధం కావాలని యత్నిస్తున్నారు. కథ నచ్చాలే గానీ ఏ పాత్ర పోషించడానికైనా సై అంటూ రెడీ అయిపోతున్నారు. అలా ఇప్పటివరకు చేయని పాత్రలను సెలెక్ట్ చేసుకుంటూ.. అందుకు తగ్గట్టుగా తమను తాము మలుచుకుంటున్నారు. అయితే ఓ సారి మన కథానాయకుల ప్రయాణాన్ని గమనిస్తే వారు వెండితెర ప్రభుత్వ ఉద్యోగులుగా మారిపోతున్నట్లు అర్థమవుతోంది. సాధారణంగా ఇప్పటివరకు ప్రభుత్వ ఉద్యోగం అంటే మన కథనాయకులు కేవలం పోలీస్ డ్రెస్లో మాత్రమే కనిపించారు. కానీ ఇప్పుడు టీచర్ నుంచి మొదలు కలెక్టర్ వరకు అన్ని రకాల గవర్నమెంట్ ఆఫీసర్ రోల్స్ పోషించేస్తున్నారు. ఈ ట్రెండ్ గత కొద్ది కాలంగా కాస్త ఎక్కువైందనే చెప్పాలి. నేచురల్ స్టార్ నాని నుంచి మెగాపవర్ స్టార్ రామ్చరణ్ వరకు.. ఇలా పలువురు హీరోలు ఈ పంథానే ఎంచుకున్నారు. ఈ నేపథ్యంలో ఓ సారి ఏయే హీరోలు ఎలా కనిపించారు? ఆ చిత్రాలేంటి? అవి హిట్టా- ఫట్టా? అసలు ఇంకా ఏఏ కథానాయకులు అలాంటి రోల్స్తో రాబోతున్నారు? ఆ సంగతులను తెలుసుకుందాం..
రామారావు ఆన్ డ్యూటీ.. రవితేజ ఎంఆర్ఓగా నటించిన తాజా చిత్రం 'రామారావు ఆన్ డ్యూటీ'. రీసెంట్గా విడుదలైన ఈ మూవీ డిజాస్టర్గా నిలిచింది. రజిషా విజయన్‌, దివ్యాంశ కౌశిక్‌ కథానాయికలు. వేణు తొట్టెంపూడి, నాజర్‌, నరేశ్‌ తదితరులు కీలక పాత్రలు పోషించారు. అంతకుముందు లింగుస్వామి దర్శకత్వంలో వచ్చిన 'ది వారియర్'లో రామ్ డీసీపీగా కనిపించారు. కానీ ఇది కూడా డిజాస్టర్గా నిలిచింది.
టక్జగదీశ్.. నేచురల్ స్టార్ నాని కథానాయకుడిగా తెరకెక్కిన కుటుంబ కథాచిత్రం 'టక్ జగదీశ్'. ఇందులో నాని ఎంఆర్ఓగా కనిపించారు. శివ నిర్వాణ దర్శకత్వం వహించిన ఈ సినిమా అంచనాలు అందుకోలేక బాక్సాఫీస్ వద్ద చతికిలపడింది. ఈ మూవీలో రీతూవర్మ కథానాయిక. ఐశ్వర్యా రాజేశ్‌ రెండో కథానాయిక. తమన్‌ స్వరాలు అందించారు. కాగా, ప్రస్తుతం నాని 'దసరా' చిత్రంలో నటిస్తున్నారు.
రిపబ్లిక్..యువ నటుడు సాయిధరమ్ తేజ్ కలెక్టర్‌గా నటించిన చిత్రం 'రిపబ్లిక్'. ఫ్యాన్స్కు ఈ మూవీ ఓ మోస్తరుగా అనిపించినప్పటికీ.. మిగతా వర్గాల ప్రేక్షకులను ఆకట్టుకోలేకపోయింది. దేవా కట్టా దర్శకత్వం వహించిన ఈ చిత్రంలో జగపతిబాబు, రమ్యకృష్ణ, ఐశ్వర్య రాజేశ్‌ తదితరులు కీలక పాత్రలు పోషించారు. మణిశర్మ సంగీతం అందించారు.