'ఇస్మార్ట్‌ శంకర్‌' వంటి హిట్‌ తర్వాత దర్శకుడు పూరీ జగన్నాథ్‌ తెరకెక్కించిన చిత్రం కావడం, విజయ్ దేవరకొండ నటించిన తొలి పాన్‌ ఇండియా సినిమా అవడంతో 'లైగర్'ను ప్రకటించిన క్షణం నుంచే ప్రేక్షకుల్లో ఆసక్తి పెరిగింది. పోస్టర్లు, గ్లింప్స్‌ వీడియోలతో మరిన్ని అంచనాలు నెలకొల్పాయి. మరి ఈ క్రేజీ ప్రాజెక్టులో విజయ్ యాటిట్యూడ్‌ ఎలా ఉంటుంది? అసలు లైగర్ థీమ్‌ ఏంటి? అనే సందేహాలకు తాజాగా సమాధానం దొరికినట్టైంది. విజయ్ దేవరకొండ పుట్టిన రోజు సందర్భంగా 'లైగర్ హంట్‌' పేరిట లిరికల్‌ వీడియోను విడుదల చేసింది చిత్ర బృందం. ఈ పవర్‌ఫుల్‌ గీతం అన్ని వర్గాల వారిని అలరించేలా ఉంది. మిక్స్‌డ్‌ మార్షల్‌ ఆర్ట్స్‌ నేపథ్యంలో రూపొందిన ఈ సినిమా కోసం విజయ్ తన శరీరాకృతిని మార్చుకున్న సంగతి తెలిసిందే. సిక్స్‌ప్యాక్‌ బాడీతోపాటు పొడవాటి జుత్తుతో సరికొత్తగా కనిపించాడు. ఈ సినిమాలో విజయ్ సరసన అనన్య పాండే అలరించనుంది. ప్రముఖ బాక్సర్‌ మైక్‌ టైసన్‌, రమ్యకృష్ణ తదితరులు కీలక పాత్రలు పోషించారు. పూరీ కనెక్ట్స్‌, ధర్మ పొడ్రక్షన్స్‌ సంస్థలు సంయుక్తంగా నిర్మించిన ఈ సినిమా ఆగస్టు 25న ప్రేక్షకుల ముందుకు రానుంది.
'హో సీతా వదలనిక తోడవుతా..'ఎప్పటికప్పుడు తన నటనతో ప్రత్యేకతను చాటుకుంటూ అన్ని వర్గాల ప్రేక్షకులకు దగ్గరవుతున్నాడు మలయాళ హీరో దుల్కర్ సల్మాన్‌. ఈ యంగ్‌ హీరోకు తెలుగులో సైతం మంచి ఫాలోయింగ్‌ ఉంది. తాజాగా ఈ హీరో నటిస్తోన్న సినిమా 'సీతా రామం'. స్వప్న సినిమా పతాకంపై వస్తోన్న ఈ చిత్రంలోని లిరికల్‌ సాంగ్‌ ప్రేక్షకుల ముందుకు వచ్చేసింది. 'హో సీతా వదలనిక తోడవుతా..' అంటూ సాగే ఈ ఫీల్ గుడ్‌ సాంగ్‌ను ప్రముఖ రచయిత అనంత శ్రీరామ్‌ రాయగా.. ఎస్‌పీ చరణ్‌, రమ్య బెహరా అలపించారు. విశాల్‌ చంద్రశేఖర్‌ సంగీతం అందిస్తోన్న ఈ సినిమాలోని పాటను విడుదల చేస్తూ చిత్రబృందం 'మరోసారి సీతారాముల ప్రేమకథను చూడండి' అంటూ ట్విట్‌ చేసింది.