దేశవ్యాప్తంగా సంచలనం సృష్టించిన 'ది కేరళ స్టోరీ' సినిమా కథానాయిక అదా శర్మ, దర్శకుడు సుదీప్తోసేన్ ప్రమాదానికి గురయ్యారు. ఓ ప్రైవేటు ఈవెంట్కు వెళ్తుండగా.. ముంబయిలో వీరి కారు ప్రమాదానికి గురైంది. దీంతో ఇద్దరికీ గాయాలయ్యాయి. అనంతరం వీరిని దగ్గర్లోని ఆస్పత్రికి తరలించినట్లు సమాచారం. అయితే, ఈ రోజు వీరు తెలంగాణలోని కరీంనగర్లో జరుగుతున్న హిందూ ఏక్తా యాత్రలో పాల్గొనాల్సి ఉంది. కాగా, అత్యయిక ఆరోగ్య పరిస్థితి వల్ల కరీంనగర్లో జరుగుతున్న ఆ కార్యక్రమానికి హాజరు రాలేకపోతున్నట్లు ట్విట్టర్ వేదికగా తెలిపారు సుదీప్తోసేన్.
''ఈ రోజు మేము కరీంనగర్ రావాల్సి ఉంది. మా సినిమా గురించి అక్కడ మాట్లాడాల్సి ఉంది. కానీ, అకస్మాత్తుగా అనారోగ్యానికి గురికావడం వల్ల రాలేకపోతున్నా. కరీంనగర్ ప్రజలకు క్షమాణలు తెలియజేస్తున్నాను. మన కుమార్తెలను రక్షించేందుకు మేము ఈ సినిమా తీశాం. దయచేసి మమ్మల్ని సపోర్ట్‌ చేయండి''
--సుదీప్తోసేన్, ది కేరళ స్టోరీ డైరెక్టర్
కాగా, కరీంనగర్లో బీజేపీ అధ్యర్వంలో హిందూ ఏక్తా యత్రను ఆదివారం నిర్వహించారు. ఈ కార్యక్రమంలో పాల్గొనేందుకు అసోం ముఖ్యమంత్రి హిమంత బిశ్వశర్మ, తరుణ్ ఛుగ్ తిదితర ముఖ్య నేతలతో పాటు.. 'ది కేరళ స్టోరీ' చిత్ర బృందానికి కూడా ఆహ్వానం అందింది.
నేను బాగానే ఉన్నాను.. : అదా శర్మ
ఈ ప్రమాదంపై అదా శర్మ స్పందించింది. తాను బాగానే ఉన్నానంటూ ట్వీట్ చేసింది. ' నేను బాగానే ఉన్నాను. ప్రమాదం గురించి వార్తలు రావడం వల్ల నాకు చాలా మేసేజ్లు వస్తున్నాయి. మా సినిమా బృందం, మేమంతా బాగానే ఉన్నాం. సీరియస్గా ఏమీ లేదు. ఇది పెద్ద ప్రమాదమేమీ కాదు. కానీ మీరు నాపై చూపిస్తున్న అభిమానానికి కృతజ్ఞతలు' అని ట్విట్టర్లో తెలిపింది.
ఇక, ది కేరళ స్టోరీ సినిమా విషయానికొస్తే.. దర్శకుడు సుదీప్తోసేన్ ఈ చిత్రాన్ని తెరకెక్కించారు. కేరళ రాష్ట్రంలో గత కొన్నేళ్లుగా 32 వేల మంది అదృశ్యమయ్యారని వస్తున్న ఆరోపణలకు సంబంధించి వారి ఆచూకీ ఎక్కడనే ఇతివృత్తంతో ఈ సినిమాను తీశారు. నలుగురు యువతులు మతం మారి, ఉగ్రవాద సంస్థ ఐసిస్లో చేరతారనే నేపథ్యంతో సినిమా ఉంటుంది. అలా ఐసిస్లో చేరిన యువతులు ఉగ్రవాద ట్రైనింగ్ పొంది భారత్తో సహా ప్రపంచవ్యాప్తంగా అనేక దేశాల్లో ఉగ్ర చర్యలకు పాల్పడుతున్నట్లు ఈ సినిమాలో చూపించారు. ఇదే వివాదానికి దారితీసింది. అయితే, ఈ సినిమాలో చూపించేది నిజం కాదని కొందరు ఆరోపించారు.
కొన్ని రాష్ట్రాలు ఈ సినిమాపై పన్ను ఎత్తేస్తే.. మరికొన్ని రాష్ట్రాలు ప్రదర్శనలను నిషేధించాయి. దీనిపై చిత్ర బృందం కోర్టును ఆశ్రయించింది.
మే 5న విడుదలైన ఈ చిత్రం కలెక్షన్లలో దూసుకెళ్తొంది. ఇప్పటి వరకు సుమారు రూ.112 కోట్ల వసూళ్లు రాబట్టింది. ఈ సినిమాలో అదా శర్మ, సిద్ధి ఇద్నానీ, యోగితా బిహానీ, సోనియా బలానీ, ప్రముఖ తమిళ నటి దేవదర్శిని ప్రధాన పాత్రలు పోషించారు.
