వారితో పనిచేశా.. మరి ఆ తర్వాత నాకెందుకు అవకాశాలు రాలేదో: చరణ్​

'సీతారామం' సినిమాతో మరోసారి మంచి పాటలు పాడే అవకాశం దొరికిందని అన్నారు సింగర్​ ఎస్పీ చరణ్‌. ప్రముఖ సంగీత దర్శకుల దగ్గర తాను పాడిన పాటలు మంచి ఆదరణ పొందాయని, అయినా ఆ తర్వాత తనకు ఎక్కువగా ఎందుకు అవకాశాలు రాలేదో మిలియన్‌ డాలర్ల ప్రశ్న అని చెప్పారు.

"గుర్తు పెట్టుకుని పాడుకునే పాటలు మెలోడీలే. ఫాస్ట్‌ బీట్‌ పాటల్ని సినిమా విడుదలైన తర్వాత మరిచిపోతామేమో! మెలోడీలు అలా కాదు. నవతరం సంగీత దర్శకులూ వీటిపైనే ఎక్కువ శ్రద్ధ చూపిస్తున్నార"న్నారు ప్రముఖ గాయకుడు ఎస్పీ చరణ్‌. తండ్రి ఎస్పీ బాలు వారసత్వం పుణికి పుచ్చుకుని, గాయకుడిగా పాటతో ప్రయాణం కొనసాగిస్తూనే... మరోపక్క నిర్మాతగానూ అభిరుచిని చాటారు. ఇటీవల 'సీతారామం' సినిమాలో రెండు పాటల్ని ఆలపించారు. 'ఓహ్‌ సీతా', 'ఇంతందం...' అంటూ సాగే ఆ పాటలు చక్కటి ఆదరణ పొందాయి. దుల్కర్‌ సల్మాన్‌ కథానాయకుడిగా.. హను రాఘవపూడి దర్శకత్వంలో తెరకెక్కిన 'సీతారామం' ఆగస్టు 5న ప్రేక్షకుల ముందుకొస్తోంది. ఈ సందర్భంగా ఎస్పీ చరణ్‌ విలేకర్లతో ముచ్చటించారు. ఆ విషయాలివీ...

"మరోసారి మంచి పాటలు పాడే అవకాశం 'సీతారామం'తో లభించింది. చిరకాలం నిలిచిపోయేలా ఉంటాయివి. స్వచ్ఛమైన తెలుగుతో నిండి, పాడుతున్నప్పుడే ఎంతో తీయగా అనిపించింది. రచయిత కేకే, సంగీత దర్శకుడు విశాల్‌ చంద్రశేఖర్‌ పని తీరులో కొత్త అందం కనిపించింది. నాన్న పాడాల్సిన పాటలు అప్పుడూ ఉన్నాయి, ఇప్పుడూ ఉంటాయి. అలాగని నాన్నలా పాడాలని, ఆయన పాడదగ్గ పాటలు నా దగ్గరికి వస్తున్నాయని అనుకోవడం లేదు. ఇప్పుడు నా దగ్గరికి వచ్చిన పాటల్ని శక్తిమేరకు పాడాలనేదే నా ప్రయత్నం".

"గాయకుడిగా నేను చిత్ర పరిశ్రమకి పరిచయమై 25 ఏళ్లు పైనే అవుతుంది. వెయ్యిపాటలకి పైగా పాడాను. మణిశర్మ, కీరవాణి, దేవిశ్రీప్రసాద్‌, ఆర్పీ పట్నాయక్‌... ఇలా అందరు సంగీత దర్శకుల దగ్గర నేను పాడిన పాటలు మంచి ఆదరణ పొందాయి. ఆ తర్వాత ఎక్కువగా ఎందుకు అవకాశాలు రాలేదనేది మిలియన్‌ డాలర్ల ప్రశ్న. నిర్మాణంలో బిజీగా ఉండటంతో పాడలేనని ఎప్పుడూ చెప్పలేదు. రికార్డింగ్‌ కోసం నన్ను సంప్రదించిన ప్రతి ఒక్కరికీ అందుబాటులోనే ఉన్నా. నిర్మాణం పరంగా తమిళంలో కొన్ని కొత్త ప్రణాళికలు ఉన్నాయి. తెలుగులో ఇంకా చేయలేదు".
"తెలుగు సంగీత ప్రపంచంలో ప్రతిభకి కొదవ లేదు. వారి ప్రతిభని ప్రదర్శించేందుకు తగ్గ వేదికలూ దొరుకుతున్నాయి. నాన్న నిర్వహించిన వేదికల నుంచి వెలుగులోకి వచ్చినవాళ్లే 70, 80 శాతం కొనసాగుతున్నారు. భవిష్యత్తులో మరింత మంది గాయకులు పరిశ్రమకి వస్తారని నా నమ్మకం. నాన్నలా సంగీత దర్శకత్వంపై దృష్టి పెట్టే ఆలోచనేమీ లేదు".

ఇదీ చూడండి: 'జాన్వీ.. విజయ్‌ దేవరకొండను ఇష్టపడుతున్నావా?'