Shahrukh Khan Strong Counter To Netizen :బాలీవుడ్ బాద్షా షారుక్ ఖాన్ 'జవాన్' , 'పఠాన్' సినిమాలతో బాక్సాఫీసు వద్ద కలెక్షన్ల వర్షం కురిపించారు. ఈ సినిమాలో ప్రపంచవ్యాప్తంగా దాదాపు రూ.వెయ్యి కోట్లకు పైగా వసూళ్లు రాబట్టాయి. అయితే హ్యాట్రిక్ కొట్టాలని ప్రయత్నిస్తున్న షారుక్ ఖాన్ 'డంకీ' సినిమాతో ఈ నెల 21న ప్రేక్షకులు ముందుకు రాబోతున్నారు. ఈ సినిమాలో షారుక్‌తో పాటు విక్కీ కౌశల్ అందాల నటి తాప్సీ కీలక పాత్రలో పోషించారు. రాజ్కుమార్ హిరాణీ దర్శకత్వం వహించిన ఈ సినిమా ట్రైలర్ ఇటీవల విడుదల చేశారు. ట్రైలర్‌కు ప్రేక్షకుల నుంచి వస్తోన్న రెస్పాన్స్‌ను దృష్టిలో ఉంచుకుని షారుక్ తాజాగా ట్విటర్‌ చాట్ నిర్వహించారు. నెటిజన్లు అడిగిన పలు ప్రశ్నలకు బదులిచ్చారు. అయితే అందులో ఓ నెటిజన్ షారుక్ను ఇబ్బందికర ప్రశ్న అడిగాడు. దీంతో అందుకు తగ్గట్టుగానే స్పందించిన షారుక్ దిమ్మతిరిగిపోయాల సమాధానమిచ్చారు.
ట్విట్టర్ చాట్ సందర్భంగా ఓ నెటిజన్ 'పీఆర్‌ టీమ్‌ సరిగ్గా పని చేయడం వల్లే ఇటీవల మీరు నటించిన రెండు చెత్త సినిమాలు బాక్సాఫీస్‌ వద్ద ఘన విజయాన్ని అందుకున్నాయి. అలాంటి పబ్లిసిటీతో డంకీ సినిమా కూడా విజయాన్ని అందుకుంటుందని మీరు భావిస్తున్నారా?' అని అడిగాడు. దీనిపై షారుక్ ఘాటుగా స్పందించారు. 'మామూలుగా మీలాంటి తెలివైన వాళ్లకు నేను రిప్లై ఇవ్వను. కాకపోతే మీ విషయంలో కాస్త వెసులుబాటు కల్పించా. ఎందుకంటే మీరు మలబద్ధకంతో ఇబ్బంది పడుతున్నారు. అలాగే, మీకు మంచి మందులు పంపించమని మా పీఆర్‌ టీమ్‌కు చెబుతా. మీరు త్వరలోనే కోలుకుంటారని భావిస్తున్నా' అని షారుక్ నెటిజన్కు చురకలంటించారు.