Shahrukh Khan Dhoom 4 :జానర్ ఏదైనా సరే తమ నటనతో అభిమానులను ఇట్టే ఆకట్టుకుంటారు కొందరు స్టార్స్. అందులో బాలీవుడ్ బాద్షా షారుక్ ఖాన్ ఒకరు. ఒకానొక కాలంలో రొమాంటిక్ సినిమాల్లో నటించి డ్రీమ్ బాయ్గా సందడి చేసిన ఈ స్టార్ హీరో ఆ తర్వాత కొంత కాలానికి తన స్టైల్ను మార్చుకుని యాక్షన్ ఫీల్డ్లోకి ఎంట్రీ ఇచ్చారు. 'దిల్ వాలే దుల్హనియా లే జాయేంగా'తో అమ్మాయిల మనసులు దోచిన ఈ సొట్టుబుగ్గల హీరో, 'డాన్', 'రావన్', 'రాయిస్' లాంటి యాక్షన్ సినిమాల్లో మెరిసి యూత్ను ఆకట్టుకున్నారు. ముఖ్యంగా ఈయన నటించిన 'డాన్' మూవీ యాక్షన్ సినిమాల్లో సూపర్ ఫేమస్ అవ్వడమే కాకుండా ఓ నయా ట్రెండ్ సెట్ చేసింది. ఇప్పటికే ఇది మూడు పార్టులుగా విడుదలై సెన్సేషన్గా నిలిచింది.
ఇక తాజాగా వచ్చిన 'జవాన్' సినిమా గురించి ప్రత్యేకంగా చెప్పనక్కర్లేదు. భారీ అంచనాల నడుమ వచ్చిన ఈ మూవీ సూపర్ హిట్ టాక్ అందుకుని ఎన్నో బాక్సాఫీస్ రికార్డులు బద్దలు కొట్టింది. ఆ తర్వాత షారుక్ 'డంకీ' సినిమాలో నటించారు. ఇది కూడా ప్రస్తుతం మంచి టాక్ అందుకుని దూసుకెళ్తోంది. అయితే ఈ సినిమా తర్వాత ఆయన తదుపరి ప్రాజెక్ట్ అప్డేట్ గురించి అభిమానులు ఆతృతగా ఎదురుచూస్తున్నారు.
అయితే సినీ వర్గాల సమాచారం ప్రకారం ఈ బీటౌన్ బాద్షా త్వరలో ధూమ్ ఫ్రాంచైజీలో తెరకెక్కనున్న ధూమ్-4 సినిమాలో మెరవనున్నారట. అంతే కాకుండా ఈ చిత్రంలో మెగా పవర్ స్టార్ రామ్ చరణ్ పోలీసు పాత్ర చేయనున్నారని సమాచారం. అయితే ఈ విషయంపై ఇప్పటి వరకు ఎటువంటి అఫీషియల్ అనౌన్స్మెంట్ రాలేదు. కానీ ఫ్యాన్స్ మాత్రం ఈ రూమర్ను ట్రెండ్ చేస్తూ నెట్టింట సంబరాలు చేసుకుంటున్నారు. ఆయన యాక్షన్ మూవీ క్లిప్పింగ్స్ను ధూమ్ సాంగ్స్, డైలాగ్స్తో జత చేసి సోషల్ మీడియాలో వైరల్ చేస్తున్నారు.