Shahrukh Khan Jawan : బాలీవుడ్ బాద్షా షారుక్ ఖాన్ లీడ్లో రోల్లో తెరకెక్కుతున్న యాక్షన్ ఎంటర్టైనర్ 'జవాన్'. 'రాజా రాణీ' ఫేమ్ దర్శకుడు అట్లీ రూపొందిస్తున్న ఈ సినిమాపై ఇప్పటికే అభిమానుల్లో భారీ అంచనాలు ఏర్పడ్డాయి. తాజాగా విడుదలైన హిందీ ప్రివ్యూ కూడా మంచి క్రేజ్ సంపాదించుకున్న విషయం తెలిసిందే. నయనతార , విజయ్‌ సేతుపతి, ప్రియమణి లాంటి స్టార్స్ కీలక పాత్రల్లో తెరకెక్కుతున్న ఈ సినిమా.. సెప్టెంబర్‌ 10న థియేటర్లలో సందడి చేయనుంది. ఈ క్రమంలో షారుక్ కూడా తన సినిమా ప్రమోషన్స్ పనుల్లో బిజీగా ఉన్నారు. తాజాగా ట్విటర్ వేదికగా #AskSRK పేరుతో ఫ్యాన్స్తో ముచ్చటించారు. ఈ సందర్భంగా అభిమానులు అడిగిన ప్రశ్నలకు జవాబిచ్చిన కింగ్ ఖాన్.. 'జవాన్' సినిమాకు సంబంధించిన విశేషాలను పంచుకున్నారు. అవేంటంటే..
Shahrukh Khan Ask me anything : 'జవాన్' సాంగ్స్ ఎప్పుడు రిలీజ్ చేస్తారు?
షారుక్: సినిమాలోని అన్ని పాటలు కచ్చితంగా అందరినీ ఆకట్టకుంటాయని నేను ఆశిస్తున్నాను. ప్రస్తుతం వాటి ఎడిట్‌ వర్క్‌ జరుగుతోంది. త్వరలోనే విడుదలవుతాయి.
'జవాన్'లో మీకు ఇష్టమైన యాక్షన్ సీన్ ఏది?
షారుక్: ఈ సినిమాలో చాలా యాక్షన్ సీన్లు ఉన్నాయి. ట్రక్కులతో కూడిన ఓ ఫైటింగ్‌ సీన్ నాకు చాలా నచ్చింది. ఇది నా వ్యక్తిగత అభిప్రాయం మాత్రమే. మీకు మరేదేమైనా నచ్చుతుందేమో.
నయనతార, విజయ్‌ సేతుపతితో కలిసి నటించడం మీకు ఎలా అనిపించింది?
షారుక్:నయనతార చాలా మంచి వ్యక్తిత్వం ఉన్న నటి. అందరితోనూ ఎంతో ప్రేమగా, గౌరవంగా ఉంటుంది. విజయ్‌ సేతుపతి కాస్త క్రేజీగా ఉంటారు. వాళ్లిద్దరి నుంచి నేను చాలా విషయాలు నేర్చుకున్నాను.
ఇప్పటి వరకు ఏ సినిమాలో చేయనిది.. 'జవాన్'లో మాత్రమే చేసిన పని ఏమైనా ఉందా?
షారుక్: తమిళంలో ఒక పాటలో కొన్ని లైన్లు పాడాను. యూనిట్ అంతా నన్ను చాలా ఆదరించారు. తమిళ ప్రేక్షకులు కూడా నన్నెంతో ప్రోత్సహిస్తున్నారు.