జిమ్‌ అతడికి మోడలింగ్‌ చేసే అవకాశాలను కల్పిస్తే ఆ రంగం ద్వారా సినిమాల్లోకి ప్రవేశం లభించింది. అలా మలయాళ సినిమాతో తెరంగేట్రం చేసి, చాలా తక్కువ సమయంలోనే తెలుగు తెరకూ పరిచయమవుతున్నాడు 'శాకుంతలం'లోని దుష్యంతుడు దేవ్ మోహన్. తెలుగు తెరపై ఇంకా సినిమా రిలీజ్ కూడా కాలేదు. అప్పుడే అమ్మాయిల మనసులు దోచేశాడు ఈ మల్లు కుర్రాడు. అసలు ఈ మిస్టర్ ఇండియా ఫైనలిస్ట్ సినిమాల్లోకి ఎలా ఎంట్రీ ఇచ్చాడో తన మాటల్లోనే..
అనుకోకుండా మోడలింగ్‌లోకి..
మా స్వస్థలం కేరళలోని తిరుచ్చూర్‌. అమ్మానాన్నా, అక్కా నేను.. ఇదీ మా కుటుంబం. సినిమాల్లోకి రావాలనే ఆలోచన నాకు మొదట్లో లేదు. మెకానికల్‌ ఇంజినీరింగ్‌ చేశాక ఓ కార్పొరేట్‌ సంస్థలో ఉద్యోగం రావడంతో బెంగళూరుకు వెళ్లిపోయా. మొదటినుంచీ నాకు వ్యాయామం చేయడం అలవాటు. అలా బెంగళూరులోనూ రోజూ జిమ్‌కు వెళ్లేవాడిని. అక్కడే నాకు ఓ మోడల్ పరిచయమై మోడలింగ్‌ చేయమనీ..మిస్టర్ ఇండియా పోటీల్లో పాల్గొనమనీ సలహా ఇచ్చాడు. నాకూ ప్రయత్నించాలనిపించి ఆ పోటీలకు వెళ్లి.. ఫైనలిస్ట్‌గా ఎంపికయ్యా. ఆ తరువాత ఓ వైపు ఉద్యోగం చేస్తూనే మరోవైపు వారాంతాల్లో ఫ్యాషన్‌ షోలల్లో పాల్గొనేవాడిని.
తొలి అవకాశం..
మోడలింగ్‌ చేస్తున్నప్పుడే.. నా ఫ్రెండ్‌ ఒకరు ఓ నిర్మాణ సంస్థ కొత్త హీరోలను వెతుకుతోందని చెప్పి..నన్ను ప్రయత్నించమన్నాడు. తీరా వెళ్తే నాలుగువందల మందికి పైగా అభ్యర్థులు ఉన్నారక్కడ. అందరిలానే నేనూ ఆడిషన్‌ ఇచ్చేసి వచ్చేశా. కొన్నిరోజులకే నన్ను సెలక్ట్‌ చేసినట్లు చెప్పారు. అయితే..ఎంతకీ షూటింగ్‌ మొదలుపెట్టేవారు కాదు. దాంతో ఆగలేక దర్శకుడికి తరచూ ఫోన్లు చేసేవాడిని. ఆయనేమో.. సినిమా అంటూ తీస్తే నన్నే హీరోగా పెట్టుకుంటానని చెప్పేవారు. ఆ సినిమా షూటింగ్‌ మొదలయ్యాక కానీ.. నేను హీరోనవుతున్నాననే నమ్మకం నాకు కలగలేదు. చివరకు ఆ సినిమా ఓటీటీలో విడుదలై.. మంచి గుర్తింపు తెచ్చిందనుకోండీ. అదే 'సూఫియుం సుజాతయుం'.