Sankranthi 2024 Movies :సూపర్ స్టార్ రజనీకాంత్ ఇటీవలే 'జైలర్' చిత్రంతో దాదాపు రూ.600 కోట్లకు పైగా కలెక్షన్లను కొల్లగొట్టి.. గట్టి కమ్ బ్యాక్ ఇచ్చిన సంగతి తెలిసిందే. ఇంకా ఆ విజయాన్ని మర్చిపోనేలేదు.. అంతలోనే రజనీ నటించిన మరో లేటెస్ట్ మూవీ సంక్రాంతి రిలీజ్కు రెడీ అయిపోయింది. అదే 'లాల్ సలాం'(Rajnikanth Laal Salaam). ఈ చిత్రంలో మొయిద్దీన్ భాయ్ అనే గెస్ట్ రోల్లో రజనీ నటించారు.
ఈ సినిమాను రజనీ కాంత్ పెద్ద కుమార్తె ఐశ్వర్య రజనీకాంత్ తెరకెక్కించడం విశేషం. స్పోర్ట్స్ అండ్ మాఫియా బ్యాక్ డ్రాప్లో రానున్న ఈ సినిమాలో విష్ణు విశాల్, విక్రాంత్ సంతోష్ హీరోలుగా నటించగా.. ప్రముఖ సంగీత దర్శకుడు ఏఆర్ రెహమాన్ స్వరాలు సమకూర్చారు. ప్రముఖ నిర్మామ సంస్థ లైకా ప్రొడక్షన్స్ నిర్మించింది.
పెరిగిపోతున్న జాబితా.. అయితే ఈ రిలీజ్ డేట్ అనౌన్స్ చేయడం వరకు అంతా బాగానే ఉంది కానీ.. అసలు సవాల్ ఇక్కడే మొదలైంది. సంక్రాంతి పండక్కు బరిలోకి దిగే చిత్రాల జాబితా చూస్తే.. బాక్సాఫీస్ రేసు రసవత్తరంగా ఉండనుందని తెలుస్తోంది. రోజురోజుకు ఈ పొంగల్కు విడుదల కానున్న సినిమా లిస్ట్ పెరిగిపోతూ వస్తోంది.
టాలీవుడ్ బాక్సాఫీస్ ముందుసూపర్ స్టార్ మహేశ్ బాబు నటించిన గుంటూరు కారం, విజయ్ దేవరకొండ - పరశురామ్ చిత్రం, తేజ సజ్జా - ప్రశాంత్ వర్మ హనుమాన్, నాగార్జున నా సామిరంగ కూడా ముగ్గుల పండక్కే కన్ఫామ్ చేసుకున్నాయి. సలార్ దెబ్బకు క్రిస్మస్కు విడుదల కావాల్సిన వెంకటేశ్ సైంధవ్ కూడా పతాకాల పండక్కే రానుందని అంటున్నారు. రవితేజ ఈగల్ కూడా సంక్రాంతికే ఖరారు చేసుకుంది.