Salaar Movie Tickets Booking :ప్రపంచవ్యాప్తంగా సినీ ప్రేక్షకులతో పాటు నటీనటులు కూడా ఎంతో ఆసక్తిగా ఎదురుచూస్తున్న చిత్రం 'సలార్'. పాన్ ఇండియా స్టార్ ప్రభాస్ హీరోగా ప్రశాంత్‌ నీల్‌ దర్శకత్వంలో రూపొందిన ఈ సినిమాను క్రిస్మస్ కానుకగా ప్రేక్షకుల ముందుకు తీసుకు రాబోతున్నారు. ఈ సినిమాపై భారీ అంచనాలు నెలకొన్నాయి.
మిడ్నైట్ షోకు వెళ్తున్నా: నిఖిల్
అయితే హైదరాబాద్ మూసాపేటలో ఉన్న శ్రీరాములు థియేటర్లో సలార్ సినిమా ప్రదర్శితమవ్వనుంది. డిసెంబర్ 21వ తేదీ అర్థరాత్రి ఒంటి గంటకు మిడ్నైట్ షో వేయనున్నారు. అయితే ఈ షోకు వెళ్లేందుకు పెద్ద ఎత్తున్న సెలబ్రెటీలు క్యూ కడుతున్నారు. ఇటీవలే యంగ్ హీరో నిఖిల్ తాను శ్రీరాములు థియేటర్లో అర్థరాత్రి ఒంటి గంట షోకు హాజరు అవ్వబోతున్నట్లుగా ప్రకటించారు.
100 టికెట్లు ఫ్రీ!
అంతే కాకుండా ఆ షోకు తాను 100టికెట్లను ప్రభాస్ అభిమానులకు ఇవ్వబోతున్నట్లుగా నిఖిల్ పేర్కొన్నారు. "పదేళ్ల క్రితం మిర్చి సినిమాను అదే శ్రీరాములు థియేటర్లో అర్థరాత్రి షో చూశాను. ఇప్పుడు మళ్లీ వందమంది ప్రభాస్ అభిమానులతో కలిసి సలార్ సినిమాను చూడబోతున్నాను" అని ఎక్స్(ట్విట్టర్) లో ప్రకటించారు. హీరో నిఖిల్ చేసిన ఈ ప్రకటన అందరి దృష్టిని ఆకర్షిస్తోంది.
టికెట్ల అమ్మకాలు షురూ!
అయితే అన్ని రాష్ట్రాల్లో సలార్ మూవీ టికెట్ల అమ్మకాలు ఇప్పటికే ఆన్‌లైన్‌లో స్టార్ట్‌ అయ్యాయి. కానీ తెలుగు రాష్ట్రాల్లో ఇంకా స్టార్ట్‌ కాలేదు. సలార్ చిత్రానికి సంబంధించి తెలంగాణ నైజాం హక్కులను మైత్రి మూవీ మేకర్స్‌ సొంతం చేసుకున్న విషయం తెలిసిందే. ఈ క్రమంలో టికెట్ ధరలను పెంచాలని తెలంగాణ ప్రభుత్వాన్ని మైత్రి మేకర్స్‌ కోరిందని ఇండస్ట్రీలో టాక్‌ వినిపిస్తోంది.