Salaar Movie Promotions : 'బాహుబలి' సినిమాతో పాన్ఇండియా స్టార్గా ఎదిగిన ప్రభాస్, మరో 10 రోజుల్లో 'సలార్'తో ప్రేక్షకుల ముందుకు వస్తున్నారు. అయితే 'సాహో', 'రాధే శ్యామ్, 'ఆదిపురుష్' సినిమాలు ఆశించిన స్థాయిలో ఫలితాన్ని ఇవ్వనందున, డార్లింగ్ ఫ్యాన్స్ 'సలార్' పైనే ఆశలు పెట్టుకున్నారు. అయితే ఈ సినిమా రిలీజ్కు ఇంకా కేవలం 10 రోజుల సమయం మాత్రమే మిగిలి ఉంది. అయినప్పటికీ 'సలార్' ప్రమోషన్స్ సందడి మాత్రం ఎక్కడా కనిపించడం లేదు. దీంతో సలార్ క్రిస్మస్ బరిలోనైనా నిలుస్తుందా లేదా అన్న డౌట్ ఫ్యాన్స్లో మొదలైంది.
సాధారణంగా ఓ సినిమా పాన్ ఇండియా లెవెల్లో విడుదల అవుతుందంటే రిలీజ్కు ఒక నెల ముందు నుంచే హడావుడి మొదలవుతుంది. సాంగ్స్ రిలీజ్, ప్రీ-రిలీజ్ ఈవెంట్స్, నటీనటుల ఇంటర్వ్యూలు అంటూ ప్రమోషన్స్ కార్యక్రమాలు మొదలైపోతాయి. కానీ, 'సలార్' విషయంలో మాత్రం అటువంటి వాతావరణమే కనిపించడం లేదు. మూవీ విడుదలకు ఇంకా 10 రోజులే ఉన్నా నిర్మాతలు, చిత్రబృందం మాత్రం ఈ విషయాల్లో అలసత్వం ప్రదర్శిస్తోంది అనే గాసిప్స్ వినిపిస్తున్నాయి.
ప్రీ-రిలీజ్ ఈవెంట్ డౌటేనా?
'సలార్' మూవీ టీం ప్రీ-రిలీజ్ ఈవెంట్ జరపకుండానే నేరుగా విడుదలకు వెళ్లాలనే యోచనలో ఉన్నట్లు తెలుస్తోంది. దీనికి సంబంధించి ఆశలు కూడా రోజురోజుకు సన్నగిల్లుతున్నాయి. అదే జరిగితే ఓ పెద్ద సినిమా రిలీజ్కు ముందు పాటించాల్సిన ప్రమోషన్స్ పద్ధతుల్లేవీ నిర్మాతలు అనుసరించట్లేదని నెగిటివ్ కామెంట్స్ వినిపిస్తున్నాయి. ఒకవేళ ప్రమోషన్స్ విషయంలో తాము కాంప్రమైజ్ అయ్యేదే లేదంటూ మూవీ యూనిట్ చెప్పినా.. ఇప్పటికే వేదికలను బుక్ చేసి పెట్టుకోవాలి. కానీ 'సలార్'కు సంబంధించి హైదరాబాద్లో మాత్రం అలాంటి వాతావరణమే కనిపించటం లేదు. పెద్ద నగరాలైన దిల్లీ, ముంబయి, పుణె, బెంగళూరు, చెన్నైలోనూ ఇదే పరిస్థితి కనిపిస్తోంది. చూడాలి మరి ఈ విషయంలో హోంబలే ఫిల్మ్ మేకర్స్ ఏ విధంగా ముందుకు వెళ్తారో. ఇక డిసెంబర్ 22న'సలార్' గ్రాండ్గా రిలీజ్కానున్న విషయం తెలిసిందే!