దర్శకధీరుడు ఎస్ఎస్ రాజమౌళి తెరకెక్కించిన సినిమా ఆర్ఆర్ఆర్. ఆస్కార్ బరిలో నిలిచిన ఈ చిత్రాన్ని మరింత ప్రమోట్‌ చెయ్యడం కోసం విదేశాల్లో ఇటీవలే ఈ సినిమాను రీ రిలీజ్‌ చేశారు. దీని కోసం ఇప్పటికే ఆర్ఆర్ఆర్ చిత్రబృందం అమెరికా వెళ్లి థియేటర్లలో సందడి చేస్తోంది. అక్కడ ఈ సినిమా రీ రిలీజ్‌కు కూడా ప్రేక్షకుల నుంచి భారీగా స్పందన వస్తోంది. థియేటర్లలో హౌస్ఫుల్ బోర్డులు కనిపిస్తున్నాయి. ఆర్ఆర్ఆర్ అభిమానులు సినిమా టికెట్‌ల కోసం బారులు తీరుతున్నారు. తాజాగా దీనికి సంబంధించిన వీడియోలను చిత్రబృందం ట్విటర్‌లో పంచుకోగా అవి వైరల్‌గా మారాయి.
అమెరికాలోని లాస్‌ఏంజెల్స్‌లో ఓ పెద్ద థియేటర్లో ఇటీవల ఈ సినిమాను రీ రిలీజ్‌ చేశారు. 1647 సీట్లు కలిగిన ఆ థియేటర్లో టికెట్స్‌ అన్నీ హాట్‌ కేకుల్లా అమ్ముడుపోయాయి. అంతే కాకుండా తర్వాత షో కోసం వందల మంది ప్రేక్షకులు సినిమా హాలు బయట బారులు తీరారు. ఆ సినిమాలోని నాటు నాటు సాంగ్కు థియేటర్లోని ప్రేక్షకులు చిందులేశారు. సినిమా ప్రదర్శన అనంతరం చిత్రబృందం ఆడియన్స్‌తో మాట్లాడి సందడి చేసింది.