RRR oscar news : ప్రపంచ స్థాయిలో టీలీవుడ్కు ఇండస్ట్రీకి గుర్తింపు తెచ్చింది దర్శకధీరుడు రాజమౌళి తెరకెక్కించిన 'ఆర్ఆర్ఆర్' సినిమా. అయితే ఈ చిత్రబృందంలోని ఆరుగురికి ఆస్కార్ కమిటీలో అవకాశం లభించిన సంగతి తెలిసిందే. దీంతో నెటిజన్లు, సినీ ప్రముఖులు వారికి ప్రత్యేకంగా అభినందనలు తెలుపుతున్నారు. తాజాగా వీరికి శుభాకాంక్షలు తెలుపుతూ జక్కన్న ట్వీట్ చేశారు.
"ఆర్‌ఆర్ఆర్లోని ఆరుగురికి ఆస్కార్ కమిటీలో సభ్యత్వం రావడం ఎంతో గర్వంగా ఉంది. అలాగే ఆనందంగానూ ఉంది. ఇండియన్ సినిమా ఇండస్ట్రీకి సంబంధించి ఈ ఏడాది ఆహ్వానం అందుకున్న వారందరికి నా అభినందనలు" అంటూ రామ్ చరణ్, ఎన్టీఆర్, కీరవాణి, చంద్రబోస్, సెంథిల్‌, సిరిల్‌లకు ప్రత్యేకంగా శుభాకాంక్షలు తెలిపారు. అయితే రాజమౌళి చేసిన ట్వీట్‌కు భారీ స్థాయిలో నెటిజన్లు స్పందిస్తున్నారు. 'మీకు కూడా ఆహ్వానం అంది ఉంటే ఆనందం మరింత రెట్టింపు అయ్యేది', 'మీరు లేకుండా ఆ జాబితా అసంపూర్తిగా ఉంది' అంటూ కామెంట్లు చేస్తూ.. జక్కన్నపై ఉన్న అభిమానాన్ని చాటుకుంటున్నారు. కాగా, ప్రతి ఏడాది లాగానే ఈ సంవత్సరం కూడా ఆస్కార్ అవార్డులను ప్రదానం చేసే 'ద అకాడమీ ఆఫ్‌ మోషన్‌ పిక్చర్స్‌ ఆర్ట్స్‌ అండ్‌ సైన్సెస్‌' కొత్తగా ఆస్కార్ కమిటీలో 398 మందికి సభ్యత్వం కల్పించింది.
మణిరత్నంకు ఏఆర్‌ రెహమాన్‌ శుభాకాంక్షలు..తన సినిమాలతో ప్రేక్షకులను మరో ప్రపంచంలోకి తీసుకువెళ్లే దర్శకుడు మణిరత్నం. ఆయనకు కూడా ఈ ఆస్కార్ కమిటీలో స్థానం దక్కింది. దీనిపై ఆస్కార్ అవార్డు గ్రహీత ఏఆర్‌ రెహమాన్‌ ఆనందం వ్యక్తం చేశారు. మణిరత్నంకు ప్రత్యేకంగా శుభాకాంక్షలు తెలుపుతూ ఓ ట్వీట్ చేశారు. ఆయనతో కలిసి మరిన్ని సినిమాలకు పనిచేయాలని కోరుకుంటున్నట్లు తన మనసులోని మాటను తెలిపారు. కాగా, వీళ్లిద్దరి కాంబినేషన్‌లో గతంలో వచ్చిన ఎన్నో సినిమాలు మ్యూజికల్‌ హిట్స్‌గా నిలిచాయి. ఆ పాటలు ఇప్పటికీ సోషల్‌మీడియాలో ట్రెండింగ్‌లో కొనసాగుతుంటాయి.