'ధమాకా', 'వాల్తేరు వీరయ్య'తో బ్యాక్ టు బ్యాక్ సూపర్ హిట్లను అందుకున్న మాస్‌ మహారాజా రవితేజ నటించిన కొత్త చిత్రం 'రావణాసుర'. సుధీర్‌ వర్మ దర్శకత్వం వహించిన ఈ చిత్రంలో ఏకంగా ఐదుగురు హీరోయిన్లు నటించారు. మేఘా ఆకాష్‌, అను ఇమ్మాన్యుయేల్‌, ద‌క్షా న‌గార్క‌ర్‌, ఫ‌రియా అబ్దుల్లా, పూజిత పొన్నాడ హీరోయిన్లుగా నటించారు. యంగ్‌ హీరో సుశాంత్‌ కీలక పాత్రలో కనిపించి ఆకట్టుకున్నారు. ఇప్పుటికే విడుదలైన ట్రైలర్‌, సాంగ్స్.. సినిమాపై అంచనాలను పెంచాయి. అభిషేక్ పిక్చ‌ర్స్, ఆర్‌టీ టీమ్ వ‌ర్క్స్ బ్యాన‌ర్‌పై అభిషేక్ నామా నిర్మించిన ఈ చిత్రం.. భారీ అంచనాలతో నేడు(ఏప్రిల్‌ 7) ఆడియెన్స్ ముందుకు వచ్చింది. ఈ సినిమా చూసేందుకు ప్రేక్షకులు కూడా థియేటర్లకు భారీగానే తరలివచ్చారు. వాళ్లందరూ సినిమా చూసిన తర్వాత సోషల్ మీడియా ద్వారా తమ అభిప్రాయాల్ని వ్యక్తం చేస్తున్నారు. మరి 'రావణాసుర' కథేంటి? అడియెన్స్ ఏమంటున్నారు? రవితేజ మరో హిట్ అందుకున్నట్టేనా? తెలుసుకుందాం..
'రావణాసుర పూర్తి మసాల థ్రిల్లర్‌ సినిమా. రవితేజ ఫ్యాన్స్‌తో పాటు మాములు ప్రేక్షకులకు కూడా నచ్చుతుంది. రవితేజను ఇంతకుముందు ఎప్పుడు చూడని రోల్లో చూస్తాం. కథ, ఇంటర్వెల్ సన్నివేశం, బ్యాక్గ్రౌండ్ మ్యూజిక్‌ బాగుంది' అని ఓ అభిమాని చెప్పుకొచ్చాడు. 'అన్నా దయచేసి మళ్లీ ఇలాంటి సినిమాలు తీయొద్దు. నిప్పు, ఖిలాడీ కలిపి తీసినట్టుంది. ఖిలాడీనే కాస్త బెటర్. నీ సినిమాలు ఫ్లాప్ అవ్వకూడదని భావిస్తాం. కానీ నువ్వు డిజాస్టర్ సినిమాలు తీస్తావ్' అని ఓ అభిమాని ఆవేదన వ్యక్తం చేశాడు. 'సినిమా అదిరిపోయింది.. నెగటివ్ షేడ్స్లో రవితేజ అదరగొట్టేశారు.. వన్ మెన్ షో', 'ఈ సినిమాలో తెలంగాణ స్లాంగ్ వింటుంటే చెవుల నుంచి రక్తాలు వస్తున్నాయ్. అసలు ఈ తెలుగు సినిమాల్లో యాసను వినియోగించడం బ్యాన్ చేయాలి.' క్రైమ్ సీక్వెన్స్‌లు ఓకే.. ఇంటర్వెల్ సీన్ అద్భుతం.. పూర్తిగా కొత్త పాత్రలో రవితేజ కనిపించారు.. అద్భుతంగా నటించారు' అని యూజర్స్ కామెంట్స్ చేస్తున్నారు.