Ranbir Kapoor Alia Bhatt Love Story: బాలీవుడ్ మోస్ట్ రొమాంటిక్ లవర్ బాయ్‌ రణ్బీర్ కపూర్, సొట్ట బుగ్గలతో క్యూట్ క్యూట్గా కనిపించే ఆలియా భట్.. ఇటీవలే అందమైన ప్రేమకథతో వివాహబంధంలోకి అడుగుపెట్టారు. త్వరలోనే తల్లిదండ్రులు కూడా కాబోతున్నారు. అయితే వీరిద్దరు ఒకరి గురించి ఒకరు తమ అభిప్రాయాలు చెప్పుకున్నారు. అవి వారి మాటల్లోనే..
ఆలోచనలు ఒకటే
ఆలియా: చిన్నప్పుడు నాన్న బిజీగా ఉండటం వల్ల ఆయన్ని చాలా మిస్‌ అయ్యా. అందుకే నేను పెళ్లి చేసుకోబోయేవాడు మా నాన్నలా చూసుకోవాలని అనుకున్నా. ఆ విషయంలో రణ్‌బీర్‌కి నూటికి నూరుమార్కులు పడతాయి. తనూ నాలానే ఆలోచిస్తాడు.
రణ్బీర్:ఇద్దరం సినీ నేపథ్యం ఉన్నవాళ్లమే. మా ఇద్దరి తండ్రులూ బిజీగా ఉండటంతో అమ్మల సంరక్షణలో పెరిగాం. అందుకే నేను అలా ఉండకూడదనీ, పిల్లలతో వీలైనంత సమయం గడపాలనీ ఎప్పుడో నిర్ణయించుకున్నా. ఆలియా కూడా అలానే అనుకుంటుంది. ఇదనే కాదు, ఏ విషయంలోనైనా ఇద్దరం ఒకేలా ఆలోచిస్తాం.
తొలిచూపు...
ఆలియా: సంజయ్‌ లీలా భన్సాలీ దగ్గర రణ్బీర్ కొన్నిరోజులు సహాయ దర్శకుడిగా పనిచేశాడు. అప్పుడే 'బ్లాక్‌' సినిమా కోసం ఆడిషన్స్‌ జరుగుతున్నాయని తెలిసి వెళ్లా. అక్కడే రణ్‌బీర్‌కి పడిపోయా. అప్పుడు నా వయసు పదకొండేళ్లు. 'సావరియా'లో చూశాక ఇంకా ఇష్టం పెరిగింది.
రణ్బీర్:మొదటిసారి ఆలియాతో మాట్లాడిన క్షణాలు నాకిప్పటికీ గుర్తే. 'రాక్‌స్టార్‌' విడుదలైనప్పుడు- 'తనని ఎంతగా ఇష్టపడుతున్నావో రణ్‌బీర్‌కి చెప్పూ...' అంటూ ఆలియాని నా దగ్గరకు తీసుకొచ్చాడు కరణ్‌జోహార్‌. ఆలియా నన్ను మొదటిసారి ఎప్పుడు చూసిందీ, ఎంతగా ఇష్టపడిందీ, ఎందుకు అభిమానిస్తుందీ... గడగడా చెప్పుకుంటూ పోతుంటే అలా చూస్తుండిపోయా. అప్పుడే నేనూ తనకి కనెక్ట్‌ అయ్యా.
మర్చిపోలేని ప్రయాణం
ఆలియా: తరచూ షూటింగ్స్‌లోనూ, పలు కార్యక్రమాల్లోనూ కలిసే వాళ్లం. ఒకరిపై ఒకరికి మనసు నిండా ప్రేమున్నా ఆ విషయం మాత్రం పంచుకుంది లేదు. అయితే 2019లో 'బ్రహ్మాస్త్ర' సినిమా చిత్రీకరణ సమయంలో మేం మరింత దగ్గరయ్యాం. ఆ సినిమా వర్క్‌షాప్‌లో భాగంగా ఓ రోజు ఇజ్రాయెల్‌లోని టెల్‌ అవివ్‌కు విమానంలో బయల్దేరాం. ఆ సమయంలో రణ్బీర్ నా పక్క సీట్లోనే కూర్చున్నాడు. గమ్యం చేరేదాకా ఇద్దరం ఎన్నెన్నో మాట్లాడుకున్నాం. అప్పుడే తనకి నామీదున్న ప్రేమని పరోక్షంగా తెలిపాడు. మమ్మల్నీ, మా మనసుల్నీ దగ్గర చేసిన ఆ ప్రయాణం మాకో తీపి జ్ఞాపకం.
రణ్బీర్:తనకి ప్రపోజ్‌ చేసిన క్షణాలు ఎప్పటికీ ప్రత్యేకంగా ఉండిపోవాలనుకున్నా. అందుకే గతేడాది ఆలియాకి ఇష్టమైన, ప్రపంచంలోని అద్భుతమైన ప్రదేశాల్లో ఒకటైన కెన్యాలోని మసాయ్‌ మారా నేషనల్‌ రిజర్వ్‌కు తీసుకెళ్లా. ప్రకృతి సాక్షిగా ఆ చిట్టడవి మధ్యలోనే ఆలియా వేలికి డైమండ్‌ రింగు తొడిగి 'నన్ను పెళ్లి చేసుకుంటావా...' అని అడిగా. తన మనసులోని మాట నా పెదవి దాటే సరికి ఆలియా ఆనందానికి పట్టపగ్గాల్లేవు.