బాలీవుడ్ స్టార్ అమితాబ్ బచ్చన్ పుట్టినరోజు సందర్భంగా ప్రాజెక్ట్-కే బృందం సర్ప్రైజ్ అప్డేట్ ఇచ్చింది. ఐదు దశాబ్దాలుగా సినీ ఇండస్ట్రీలో ఎదురులేకుండా దూసుకెళ్తున్న పవర్హౌస్కు శుభాకాంక్షలు చెబుతూ ట్వీట్ చేసింది. ఈ సందర్భంగా ప్రాజెక్ట్-లో అమితాబ్ లుక్ను విడుదల చేసింది. చెయ్యికి బ్యాండేజీ కట్టుకొని పిడికిలి బిగించినట్లు ఉన్న చిత్రాన్ని పోస్ట్ చేసింది. లెజెండ్స్ ఎప్పటికీ అమరులుగానే ఉండిపోతారని పోస్టర్పై రాసుకొచ్చింది. ఇది అభిమానులను ఆకట్టుకుంటోంది.
బాలీవుడ్ నటుడు అక్షయ్‌కుమార్‌ ప్రధాన పాత్రలో దర్శకుడు అభిషేక్‌ శర్మ తెరకెక్కించిన చిత్రం 'రామ్ సేతు'. సత్యదేవ్‌ కీలక పాత్ర పోషించిన ఈ చిత్రంలో జాక్వెలిన్‌ ఫెర్నాండెజ్‌, నుస్రత్‌ బరూచా కథానాయికలు. దీపావళి కానుకగా ఈ సినిమా ఈ నెల 25న ప్రేక్షకుల ముందుకు రానుంది. ఈ సందర్భంగా చిత్ర బృందం మంగళవారం ట్రైలర్‌ను విడుదల చేసింది.
'ఈ దేశం శ్రీరాముడిపై నమ్మకంతో నడుస్తుంది' అంటూ నటుడు నాజర్‌ పరిచయ సన్నివేశంతో ప్రారంభమైన ట్రైలర్ ఆద్యంతం ఉత్కంఠగా సాగింది. ఇతిహాసాల్లోని నిజాన్ని వెలికితీసే వ్యక్తిగా అక్షయ్‌ కనిపించిన తీరు ఆకట్టుకునేలా ఉంది. 7000 ఏళ్ల క్రితంనాటి సంగతులు తెలుసుకునే క్రమంలో అక్షయ్‌, సత్యదేవ్‌ చేసిన సాహసం, విలన్ల గ్యాంగ్‌తో పోరాటం.. ఆసక్తి రేకెత్తిస్తున్నాయి. రామసేతు వారధి రహస్యాల నేపథ్యంలో ఈ చిత్రం రూపొందినట్టు ట్రైలర్ చూస్తే అర్థమవుతోంది.