ఎప్పుడూ షూటింగ్లో బిజీగా గడిపే సినిమా తారలు.. అప్పుడప్పుడు విహార యాత్రలు చేస్తుంటారు. కాస్త ఫ్రీ టైం దొరికితే విదేశాలకు చెక్కేస్తుంటారు. తాజాగా ఈ జాబితాలో ఆర్ఆర్ఆర్ హీరో రామ్ చరణ్ సైతం చేరిపోయారు. ప్రస్తుతం షూటింగ్ల నుంచి కాస్త విరామం తీసుకుని సతీసమేతంగా విహార యాత్రకు వెళ్లారు.
సతీమణి ఉపాసనతో కలిసి టాంజానియాలో ఎంజాయ్ చేస్తూ కనిపించారు. దీనికి సంబంధించిన ఓ వీడియోను రామ్ చరణ్ ఇన్స్టా వేదికగా ప్రేక్షకులతో పంచుకున్నారు. అందులో టాంజానియాలోని ఓ జూలో సఫారీ జీప్ నడుపుతూ కనిపించారు రామ్ చరణ్. సరదాగా వంట కూడా చేశారు. అనంతరం తన కెమెరాతో అక్కడి వన్యప్రాణుల ఫోటోలను బంధించారు. 'పేరులేని ఆఫ్రికా' అంటూ పోస్ట్‌కు క్యాప్షన్ కూడా ఇచ్చారు ఈ మెగా హీరో. బ్లాక్ టీ-షర్టు, బ్లూ జాకెట్ వేసుకున్న చెర్రీ కొత్త లుక్‌లో కనిపించడంతో ఫ్యాన్స్ ఖుషీ అవుతున్నారు. ఇప్పుడీ వీడియో సోషల్ మీడియాలో వైరల్ అవుతోంది.