సూపర్ స్టార్ రజనీకాంత్ తనదైన స్టైల్, మేనరిజంతో అభిమానుల హృదయాల్లో సుస్థిర స్థానం సంపాదించుకున్నారు. ప్రతి సినిమాలోనూ నటనతోనే కాదు ఏదో ఒక ప్రత్యేకమైన స్టైల్, పంచ్‌ డైలాగులతో అలరిస్తుంటారు రజనీ. ఏడు పదుల వయసులోనూ కుర్ర హీరోలతో పోటీపడుతుంటారు. 170కి పైగా సినిమాల్లో నటించిన రజనీకాంత్ మరికొన్ని రోజుల్లో సినిమాలకు గుడ్బై చెప్పనున్నారట. ఇప్పుడీ వార్త ఇండస్ట్రీలో హాట్‌ టాపిక్‌గా మారింది. సోషల్ మీడియా వేదికగా దీనిపై రకరకాల కామెంట్స్ వస్తున్నాయి.
సూపర్ స్టార్ రజనీకాంత్‌పై ప్రముఖ తమిళ దర్శకుడు మిస్కిన్ చేసిన వ్యాఖ్యలు ఇప్పుడు సోషల్ మీడియాలో వైరలవుతున్నాయి. లోకేశ్‌ కనకరాజ్ దర్శకత్వంలో రజనీ సినిమా చేస్తున్నట్లు మిస్కిన్ తెలిపారు. ఓ ఇంటర్వ్యూలో ఆయన మాట్లాడుతూ.. 'లోకేశ్‌ కనకరాజ్ దర్శకత్వంలో నటించాలని సూపర్స్టార్ రజనీ ఆసక్తిగా ఉన్నారు. ఈ సినిమా గురించి రజనీయే స్వయంగా లోకేశ్‌ కనకరాజ్ను అడిగారు. బహుశా ఇదే రజనీకాంత్‌కు చివరి సినిమా కావచ్చు' అని మిస్కిన్ అన్నారు. ప్రస్తుతం ఆయన చేసిన ఈ వ్యాఖ్యలు సినీ ఇండస్ట్రీలో చర్చనీయాంశంగా మారాయి. దీనిపై నెటిజన్లు రకరకాలుగా స్పందిస్తున్నారు. 'తలైవా ఇలాంటి నిర్ణయం తీసుకోరు'.. 'రజనీపై ఇలాంటి ప్రచారాలు ఆపండి' అని రజనీకాంత్ అభిమానులు సోషల్ మీడియా వేదికగా స్పందిస్తున్నారు.