Rajinikanth Himalayas : రజనీకాంత్.. ఈ పేరు తెరపై కనిపిస్తే చాలు.. ఈలలతో థియేటర్లు దద్దరిల్లాల్సిందే. ఇప్పుటికే అభిమానులు.. రజనీని వెండితెరపై చూసి రెండేళ్లు అవుతోంది. దీంతో వారంతా జైలర్ సినిమా కోసం ఎంతగానో ఎదురుచూస్తున్నారు. ఆగస్టు10న పాన్ ఇండియా స్థాయిలో ఆ చిత్రం విడుదల కానుంది. ఇప్పటికే ప్రీ బుకింగ్స్ విషయంలో ఎన్నో రికార్డులను బద్దలుకొట్టింది ఈ చిత్రం. అమెరికాలో ఇప్పటివరకు ఏ చిత్రం సాధించని ప్రీ బుకింగ్స్‌ను సొంతం చేసుకుంది. అయితే సినిమా విడుదల దగ్గర పడుతున్నా.. రజనీ హిమాలయాలకు పయణమయ్యారు.
నాలుగేళ్ల గ్యాప్ తర్వాత..
Rajinikanth Meditation Himalayas : ఎన్ని ఉన్నా.. మనశ్శాంతి ఉండడం ముఖ్యం అని నమ్మే రజనీకాంత్.. తనకు సమయం కుదిరినప్పుడల్లా హిమాలయాలకు వెళ్లడం, అక్కడ ధ్యానం చేయడం లాంటివి చేస్తూ ఉంటారు. ముఖ్యంగా ఏదైనా సినిమా షూటింగ్ పూర్తయిన తర్వాత ఎక్కువశాతం ఈ హడావిడికి దూరంగా అక్కడికి వెళ్లి ఉండాలనుకుంటారు. ఎలాంటి పరిస్థితిలోనూ ప్రతీ ఏడాది హిమాలయాలకు వెళ్లే రజనీకాంత్.. కొవిడ్ మహమ్మారి వల్ల గత నాలుగేళ్ల నుంచి వెళ్లడం లేదు. అందుకే జైలర్ రిలీజ్ ఉన్నా సరే ఈ ఏడాది చాలా గ్యాప్ తర్వాత హిమాలయాలకు వెళ్లిపోయారు.
డైరెక్టర్ నెల్సన్ దిలీప్‌కుమార్ దర్శకత్వం వహించిన జైలర్.. ప్రపంచవ్యాప్తంగా చాలా స్క్రీన్స్‌లో విడుదల కానుంది. నెల్సన్ దిలీప్‌కుమార్ లాంటి ఒక పక్కా కమర్షియల్, ఎంటర్‌టైనింగ్ దర్శకుడితో చేతులు కలిపి రజనీ తెరకెక్కించిన సినిమా కాబట్టి దీనిపై అంచనాలు ఎక్కువగానే ఉన్నాయి. ఈ మూవీకి కొంచెం పాజిటివ్ టాక్ వచ్చినా కలెక్షన్స్ విషయంలో కొత్త రికార్డులు క్రియేట్ చేసే అవకాశం ఉందని నిపుణులు భావిస్తున్నారు.