హీరో రాజశేఖర్ లవ్​ స్టోరీ.. 'పెళ్లి చేసుకోకపోయినా ఆమె నాతోనే ఉంటానంది'

జీవిత అంటే రాజశేఖర్​.. రాజశేఖర్​ అంటే జీవిత.. అనేలా ఎంతో అన్యోన్యంగా కలిసి ఉంటారు ఈ దంపతులు. తాజాగా ఈ జంట.. ఈటీవీలో వెన్నెల కిశోర్‌ హోస్ట్‌గా వ్యవహరిస్తున్న 'అలా మొదలైంది' కార్యక్రమానికి వచ్చి సందడి చేశారు. తమ ప్రేమ ఎలా మొదలైందో చెప్పుకొచ్చారు. ఆ వీడియో బాగా ఆకట్టుకుంటోంది. మీరు చూశారా?

తన నటనతో, డైలాగ్​లతో ప్రతి ప్రేక్షకుడ్ని ఆకట్టుకునే హీరో రాజశేఖర్​. ఇండస్ట్రీలో ఆయన, తన భార్య జీవిత రాజశేఖర్​ గురించి ప్రత్యేకంగా చెప్పనక్కర్లేదు. జీవిత అంటే రాజశేఖర్​.. రాజశేఖర్​ అంటే జీవిత.. అనేలా ఎంతో అన్యోన్యంగా కలిసి ఉంటారు. టాలీవుడ్​ బెస్ట్​ కపుల్స్​లో ఒకరిగా ఎంతో మంచి పేరు తెచ్చుకున్నారు. అయితే తాజాగా ఈ జంట.. వినోదభరితమైన కార్యక్రమాలతో ప్రేక్షకులను అలరిస్తున్న ఈటీవీలో వెన్నెల కిశోర్‌ హోస్ట్‌గా వ్యవహరిస్తున్న 'అలా మొదలైంది' కార్యక్రమానికి వచ్చి తమ లవ్​స్టోరీని బయటపెట్టారు. వీరి ప్రేమకథ కూడా కాస్త సినిమా స్టైల్​లోనే ఉంటుంది. కొన్ని ట్విస్టులు కూడా ఉన్నాయి. ఇంకా చెప్పాలంటే వీరి పరిచయం ఓ వింత అనుభవంతో మొదలైంది. అది తెలియాలంటే ప్రస్తుతానికి దానికి సంబంధించి రిలీజై ఆకట్టుకుంటున్న ప్రోమోను చూసేయండి..

ఈ ప్రోమోలో జీవిత రాజశేఖర్​ మాట్లాడుతూ.. "ఓసారి రాజశేఖర్‌ నా దగ్గరకు వచ్చి మీరు నాపై ఇంట్రెస్ట్​ చూపిస్తున్నారని అనిపిస్తోంది అంటూ నన్ను నేరుగా అడిగేశారు. ఆయనలో ఆ ఫ్రాంక్​నెస్​ బాగా నచ్చింది. ఆయన్ను పెళ్లికి ఒప్పించేందుకు చాలా కష్టపడ్డాను" అని పేర్కొన్నారు. ఆ వెంటనే మాట్లాడిన రాజశేఖర్​.. "అయితే ఈ విషయం తెలిసిన దర్శకుడు రాఘవేంద్రరావు.. 'రాజశేఖర్‌ విలన్‌లా ఉన్నాడు.. నమ్మకు అని జీవితకు సలహా ఇచ్చారు. అయినా పట్టుదలతో ఉన్న జీవిత నన్ను బ్రిడ్జిపై నుంచి తోసేసింది. ఆస్పత్రిలో చేర్పించి సేవలు చేసి మా అమ్మానాన్నలతో ఓకే చెప్పించింది" అని అన్నారు.

ఈ క్రమంలో జీవిత రాజశేశర్​ గతంలో జరిగిన ఓ సంఘటన గుర్తుచేసుకుని భావోద్వేగానికి గురయ్యారు. "రాజశేఖర్‌ ఓ అమ్మాయిని పెళ్లి చేసుకోవాలని అనుకున్నప్పుడు చాలా బాధపడ్డాను. ఏడ్చాను. ఆయనకు అప్పుడు ఓ అంబాసిడర్‌ కారు ఉండేది. ముందు సీట్లో మేమిద్దరం పక్కపక్కన కూర్చునేవాళ్లం. కానీ ఆ అమ్మాయి వచ్చాకు వారిద్దరు పక్కపక్కనే కూర్చున్నారు. నేను వెనకాల కూర్చున్నాను. అప్పుడు చాలా బాధపడ్డాను." అంటూ జీవిత ఎమోషనల్​ అయ్యారు. వెంటనే.. "పెళ్లి నేను చేసుకోకపోయినా పర్లేదు.. మీతోనే ఉంటానని నాతో చెప్పింది. అందుకే ఆ ప్రేమే నచ్చింది." అని అన్నారు రాజశేఖర్‌.

కాగా, రాజశేఖర్‌ ఇండస్ట్రీలోకి అడుగుపెట్టిన తొలి రోజుల్లో జీవితతో కలిసి ఓ సినిమా చేయాల్సింది. అయితే హీరోయిన్‌ అంతగా బాలేదు.. మార్చేయండి అని రాజశేఖర్​ చెప్పారట. అయితే ఆ తర్వాత రోజు నిర్మాతలు.. రాజశేఖర్‌ స్థానంలో మరో హీరోను పెట్టి సినిమా తీశారు. అలా ఈ సంఘటనతో ప్రారంభమైన వీరిద్దరి పరిచయం ఆ తర్వాత ప్రేమగా మారింది. అనంతరం 1991లో ఈ జంట పెళ్లి చేసుకున్నారు. వీరికి కూతుర్లు శివానీ, శివాత్మిక ఉన్నారు. వీరిద్దరూ ఇండస్ట్రీలో రాణించేందుకు ప్రయత్నాలు చేస్తున్నారు. ఇప్పటికే కొన్ని సినిమాలు కూడా చేశారు.

ఇదీ చూడండి:రూ.100 కోట్ల క్లబ్​లోకి 'దసరా'.. నాని కెరీర్​లో ఫస్ట్​ మూవీగా రికార్డ్​!