ఏళ్లుగా ఫ్యాన్స్​ను బంధించి లైంగిక దాడి.. సింగర్​కు 30 ఏళ్ల జైలు

లైంగిక వేధింపుల కేసులో ప్రముఖ సింగర్​ ఆర్​ కెల్లీకి 30ఏళ్ల జైలు శిక్ష విధించింది న్యాయస్థానం. స్టార్​డమ్​ను ఉపయోగించుకుని ఎంతో మంది మహిళల్ని, మైనర్లను లోబరుచుకున్నాడని​ విచారణలో తేలినట్లు కోర్టు తెలిపింది. వారిపై లైంగిక వేధింపులకు పాల్పడటమే కాక వ్యభిచారం కోసం తరలించినట్లు న్యాయస్థానం తేల్చింది.

ప్రముఖ అమెరికన్ సింగర్​ ఆర్ కెల్లీకి (55) 30 ఏళ్ల జైలు శిక్ష పడింది. తన పాపులారిటీని ఉపయోగించి తనను అనుసరించే యువతులపై పదేపదే లైంగిక వేధింపులకు పాల్పడిన కేసులో అతడు దోషిగా తేలాడు. బాధితుల్లో చిన్నారులు కూడా ఉన్నారు. వారిని బంధించి వ్యభిచారం కోసం అక్రమంగా తరలించాడని విచారణలో తేలింది.

ఈ కేసులో 2019 జులై నుంచే కెల్లీ జైలు శిక్ష అనుభవిస్తుండగా.. మానవ అక్రమ రవాణా సహా మరికొన్ని కేసుల్లో దోషిగా తేలడం వల్ల బుధవారం అతడికి 30 ఏళ్ల జైలు శిక్ష పడింది. చైల్డ్​ పోర్నోగ్రఫీ, న్యాయప్రక్రియకు ఆటంకం కలిగించడం వంటి ఆరోపణలు అతడిపై ఇంకా కొనసాగుతున్నాయి. వాటిపై ఆగస్టులో విచారణ జరగనుంది.

గదుల్లో బంధించి..: ఆరు వారాల విచారణలో కెల్లీ చేసిన అనేక దారుణాలు వెలుగులోకి వచ్చాయి. తన అభిమానులను, ఆశావహ సింగర్లను తన ఉద్యోగులు, మధ్యవర్తుల ద్వారా కెల్లీ ప్రలోభ పెట్టినట్లు తేలింది. వారిని లైంగికంగా వేధించడం సహా ఆహారం, బాత్​రూమ్​లు లేని గదుల్లో బంధించేవాడని తెలిసింది. సెక్స్​ కోసం మహిళలు, చిన్నారులు, పురుషులను నియమించుకునేందుకు దశాబ్దాల పాటు అతడు ప్లాన్ చేసినట్లు కూడా విచారణలో బయటపడింది.

ఇదీ చూడండి:'కేజీయఫ్'​ నటుడికి కారు ప్రమాదం.. వేగంగా వస్తున్న ట్రక్కు ఢీకొని..