పవర్స్టార్ పవన్కల్యాణ్ హీరోగా హరీశ్ శంకర్ దర్శకత్వంలో భవదీయుడు భగత్‌సింగ్ అనే సినిమా తెరకెక్కనుంది. అయితే, ఇప్పటివరకూ ఈ మూవీ గురించి అటు దర్శకుడు హరీశ్ శంకర్, ఇటు పవన్కల్యాణ్, ఆఖరికి చిత్ర నిర్మాణసంస్థ మైత్రీ మూవీ మేకర్స్‌ కూడా ఎలాంటి అప్డేట్స్ ఇవ్వలేదు. తాజాగా 'లవ్‌ యు రామ్‌' చిత్ర ప్రచార కార్యక్రమంలో పాల్గొన్న దర్శకుడు హరీశ్ శంకర్ తన సినిమా గురించి ఓ అప్‌డేట్‌ ఇచ్చారు. పవన్‌కల్యాణ్‌తో తీయబోయే సినిమా కోసం సీనియర్‌ దర్శకుడు దశరథ్ పనిచేస్తున్నట్లు చెప్పారు.
"నేను దుర్గా ఆర్ట్స్‌లో అసిస్టెంట్‌గా చేరినప్పుడు దశరథ్ అన్నయ్య సంతోషంతో హిట్‌ కొట్టారు. ఆ తర్వాత నేను దిల్‌రాజ్‌ నిర్మాణ సంస్థకు వెళ్తున్న సమయంలో మిస్టర్‌ పర్‌ఫెక్ట్ తో మరో బ్లాక్‌బస్టర్‌ కొట్టారు. ఆయన డైరెక్షన్‌, రైటింగ్‌ నాకు చాలా ఇష్టం. ఇప్పుడు పవన్‌తో నేను చేస్తున్న సినిమాకు స్క్రిప్ట్ డిపార్ట్‌మెంట్‌లో పనిచేస్తున్నారు. అందుకు దశరథ్ అన్నయ్యకు ధన్యవాదాలు. లవ్‌ యూ రామ్‌ నేను చూశాను. చాలా బాగుంది. సినిమా మంచి విజయం సాధించాలని కోరుకుంటున్నా" అని హరీశ్ శంకర్ తెలిపారు. అయితే, దశరథ్ భవదీయుడు భగత్‌సింగ్ కోసం పనిచేస్తున్నారా? లేదా ఏదైనా రీమేక్‌పై పనిచేస్తున్నారా? అన్న విషయాన్ని మాత్రం హరీశ్ శంకర్ చెప్పలేదు.