పవర్ స్టార్ పవన్ కళ్యాణ్- మెగా మేనల్లుడు, యంగ్ హీరో సాయి తేజ్ కలిసి 'వినోదయ సీతం' రీమేక్ చేస్తున్న సంగతి తెలిసిందే. అయితే ఈ సినిమా టైటిల్ గురించి గత కొద్ది రోజులుగా చర్చలు జరుగుతున్నాయి. తాజాగా దీనికి సమాధానం దొరికేసింది. సినిమా టైటిల్ అనౌన్స్ చేయడంతో పాటు పవన్ లుక్ మోషన్ పోస్టర్ను రిలీజ్ చేశారు మేకర్స్. ఈ చిత్రానికి 'బ్రో' అనే టైటిల్ ఖరారు చేశారు. వాస్తవానికి కొన్ని రోజుల క్రితమే ఈ టైటిల్ ఫిక్స్ చేశారని సినీ వర్గాలు వెల్లడించాయి. అయితే, ఈ రోజు(మే 18) అధికారికంగా ఆ టైటిల్ను అనౌన్స్ చేశారు మేకర్స్. ముఖ్యంగా ఈ మోషన్ పోస్టర్కు తమన్ అందించిన బ్యాక్ గ్రౌండ్ మ్యూజిక్ హైలైట్గా ఉంది. ఇది మెగా అభిమానులను ఆకట్టుకోవడంతో పాటు పూనకాలు తెప్పించేలా ఉంది.
ఇకపోతే ఈ చిత్రానికి యాక్టర్ కమ్ డైరెక్టర్ సముద్రఖని దర్శకత్వం వహిస్తున్నారు. ఈయన అంతకుముందు తెలుగులో మాస్ మహారాజా రవితేజ నటించిన 'శంభో శివ శంభో', నాని 'జెండా పై కపిరాజు' చిత్రాలకు దర్శకత్వం వహించారు. ఇప్పుడు 'బ్రో'కు వహిస్తున్నారు. ఈ చిత్రాన్ని పీపుల్స్ మీడియా ఫ్యాక్టరీ, జీ స్టూడియోస్ కలిసి సంయుక్తంగా నిర్మిస్తున్నాయి. టీజీ విశ్వప్రసాద్ నిర్మాతగా వ్యవహరిస్తున్నారు. జూలై 28న ఈ చిత్రాన్ని ప్రేక్షకుల ముందుకు తీసుకురానున్నారు. ఈ చిత్రంలో సాయి తేజ్కు హీరోయిన్గా 'రొమాంటిక్' బ్యూటీ కేతికా శర్మ నటించనుంది. ఈ సినిమాలో ప్రియా ప్రకాశ్ వారియర్ కీలక పాత్ర పోషిస్తోంది.