ODI World Cup 2023 Ind Vs Aus Tiger Nageswara Rao :టైగర్ నాగేశ్వరరావు ప్రమోషన్స్లో భాగంగా టాలీవుడ్ మాస్ మహారాజా రవితేజ వరుసగా ఇంటర్వ్యూలు ఇస్తూ.. ఈవెంట్లలో పాల్గొంటున్నారు. సినిమాను ప్రేక్షకుల్లోకి తీసుకెళ్లడానికి గ్యాప్ లేకుండా బాగా శ్రమిస్తున్నారు. తాజాగా చెన్నై చెపాక్ స్టేడియం వేదికగా.. టీమ్ఇండియా - ఆస్ట్రేలియా మధ్య వన్డే వరల్డ్‌ కప్‌ మ్యాచ్ జరుగుతున్న సంగతి తెలిసిందే.
ఈ మ్యాచ్ తెలుగు లైవ్ కామెంటరీ ప్యానెల్లో రవితేజ సందడి చేశారు. వ్యాఖ్యాతలతో కలిసి కామెంటరీ చేశారు. తన అభిప్రాయాలను పంచుకున్నారు. క్రికెట్ అభిమానులతోనూ ముచ్చటించారు. షోలో తన ఎనర్జీతో ఊపు తెప్పించారు. అలాగే ఈ మ్యాచ్లోనూ శతకాలు నమోదు అవ్వాలని రవితేజ ఆశించారు. మనోళ్లు గెలవాలని ఆల్ ది బెస్ట్ చెప్పారు. సిరాజ్ - కోహ్లీ ఇంటే తనకు ఇష్టమని చెప్పిన ఆయన.. విరాట్లో ఉండే అగ్రెషన్, యాటిట్యూడ్, లుక్ తనకెంతో ఇష్టమని అన్నారు. కోహ్లీలో ఆత్మవిశ్వాసం బాగా ఉంటుందని, అది తనకెంతో నచ్చుతుందని చెప్పుకొచ్చారు. అతడి ఫిట్నెస్ కూడా బాగుంటుందని అన్నారు. ప్రస్తుతం జరుగుతున్న మ్యాచ్లో మిచెల్ మార్ష్ బాదిన బంతిని కోహ్లీ అద్భుతంగా క్యాచ్ పట్టుకున్నాడని ప్రశంసించారు.
అలాగే టైగర్ నాగేశ్వరరావు ప్రమోషన్స్లో భాగంగానే.. మరి కొన్ని గంటల్లో ప్రసారం కానున్న తెలుగు బిగ్ బాస్ 7 వీకెండ్ సండే షోలోనూ రవితేజ సందడి చేయనున్నారు. తన టైగర్ టీమ్తో కలిసి పాటలు, డ్యాన్స్లతో ఎనర్జీ పెర్ఫార్మెన్స్ చేయనున్నారు. ఇప్పటికే దీనికి సంబంధించిన ప్రోమోలు, ఫొటోలు బయటకు వచ్చి ఆకట్టుకున్నాయి.