Nikhil Spy Movie : యంగ్ హీరో నిఖిల్ ప్రస్తుతం చేతినిండా ప్రాజెక్టులతో బిజీగా ఉన్నారు. 'కార్తికేయ-3', 'స్వయంభూ', 'ది ఇండియా హౌస్‌' ఇలా పాన్ ఇండియా లెవెల్ ప్రాజెక్టుల్లో నటిస్తున్నారు. ఈ క్రమంలో బిజీ షెడ్యూల్లో ఉన్న ఈ స్టార్ హీరో తాజాగా హైదరాబాద్లో జరిగిన ఓ కార్యక్రమంలో పాల్గొన్నారు. ఈ క్రమంలో విలేకరులు అడిగిన ప్రశ్నలకు సమాధానిమిచ్చారు. అయితే ఆయన ఈ ఈవెంట్లో ఓ షాకింగ్ విషయాన్ని రివీల్ చేశారు. తాను నటించిన ఓ సినిమాను షూటింగ్ పూర్తవ్వకుండానే రిలీజ్ చేశారని.. అందుకే ఆ చిత్రం ఫ్లాప్ అయిందని హీరో నిఖిల్ ఆవేదన వ్యక్తం చేశారు. ఆ సినిమా మరేదో కాదు ఇటీవలే విడుదలైన 'స్పై' సినిమా. అయితే గతంలో తన సినిమాల్లో జరిగిన తప్పులు రానున్న వాటిల్లో జరగకుండా చూసుకుంటాని చెప్పుకొచ్చారు.
నేతాజీ సుభాష్ చంద్ర‌బోస్ అదృశ్యం వెనుక ర‌హ‌స్యాన్ని స్పృశిస్తూ.. ఓ గూఢ‌చారి క‌థ‌తో 'స్పై' చిత్రం రూపొందింది. అయితే, ఎన్నో అంచనాల నడుమ ఈ ప్రేక్షకుల ముందుకు వచ్చింది. కానీ ఆశించిన స్థాయిలో ఉండకపోవడం వల్ల ఈ సినిమా ప్రేక్షకులను నిరాశ పరిచింది. ఈ క్రమంలో తాజాగా దీని గురించి నిఖిల్ అసహనం వ్యక్తం చేశారు.
"స్పై సినిమా విషయంలో చాలా తప్పులు జరిగాయి. పది రోజుల షూటింగ్ మిగిలి ఉండగానే పోస్ట్‌ ప్రొడక్షన్‌ పనులు చేసి విడుదల చేశారు. అందుకే అది ప్రేక్షకాదరణ పొందలేదని నా అభిప్రాయం. ఈ సినిమా విషయంలో ప్రేక్షకులను నిరాశపరచినందుకు నేను క్షమాపణలు కూడా చెప్పాను. రానున్న సినిమాల్లో అలాంటి తప్పులు జరగకుండా చూసుకుంటాను. 'కార్తికేయ-3', 'స్వయంభూ', 'ది ఇండియా హౌస్‌' సినిమాల క్వాలిటీ విషయంలో ఎక్కడా రాజీపడను. నా అభిమానులకు మంచి సినిమాలను అందిస్తాను" అని తన అభిమానులకు నిఖిల్ మాటిచ్చారు.