వెండితెరపైనే కాకుండా బుల్లితెరపైనా నందమూరి నటసింహం బాలకృష్ణ ఫుల్ జోష్తో ప్రేక్షకులను మజా అందిస్తున్నారు. ముఖ్యంగా ఓటీటీలో ప్లాట్ఫామ్ ఆహాలో అన్స్టాపబుల్తో అయితే ప్రేక్షకులను ఊపేస్తున్నారు. ఇటీవలే ప్రారంభమైన రెండో సీజన్లో ఇప్పటికే ప్రసారమైన రెండు ఎపిసోడ్లను పూర్తి చేసుకుని వీక్షకులను బాగా ఆకట్టుకుంది. తొలి ఎపిసోడ్లో నారా చంద్రబాబు నాయుడు, లోకేష్, రెండో ఎపిసోడ్లో యంగ్ హీరోలు విశ్వక్సేన్, సిద్ధు జొన్నలగడ్డ విచ్చేసి సందడి చేశారు. ఈ రెండు ఆద్యంతం ఆసక్తిగా, ఫన్గా సాగింది.
ముఖ్యంగా ఈ రెండో సీజన్ నారా చంద్రబాబు నాయుడు ఆయన తనయుడు నారా లోకేష్తో మొదలుపెట్టడంతో వీక్షకుల్లో మరింత ఆసక్తిని రేకెత్తించింది. అందుకు తగ్గట్టుగానే వివాదాస్పద అంశాలపై బాలయ్య ప్రశ్నలు వేయడం.. అందుకు చంద్రబాబు నాయుడు స్పందించడం జరిగింది. బావబావమరిది హంగామాగా సాగిన ఈ ఫస్ట్ ఎపిసోడ్ ఇప్పటికీ ట్రెండ్ అవుతూనే వుంది. యుక్త వయసులో చేసిన అల్లరి పనుల నుంచి సీనియర్ ఎన్టీఆర్ రాజకీయ విషయాలు, వైఎస్ రాజశేఖర్ రెడ్డితో తనకున్న స్నేహం.. ఇలా పలు అంశాల గురించి చంద్రబాబు బయటపెట్టిన తీరు వీక్షకుల్ని ఆకట్టుకోవడంతో పాటు ఆశ్చర్యానికి గురిచేసింది.