నేడు సీనియర్ ఎన్టీఆర్ శత జయంతి సందర్భంగా.. నందమూరి కుటుంబసభ్యులు ఆయన్ను స్మరించుకుంటూ నివాళులు అర్పించారు. అలానే తమ కొత్త సినిమాల అప్డేట్స్ను ఇచ్చి అభిమానుల్లో జోష్ను నింపారు. ఓ సారి వాటిని చూసేద్దాం..
Nandamuri new hero: నందమూరి కుటుంబం నుంచి మరో వారసుడు హీరోగా తెరంగేట్రం చేస్తున్నాడు. ఎన్టీఆర్ పెద్ద కుమారుడు నందమూరి జయకృష్ణ తనయుడు చైతన్య కృష్ణను హీరోగా పరిచయం చేస్తూ బసవతారకరామ క్రియేషన్స్ పేరుతో కొత్త బ్యానర్ను స్థాపించారు. ఎన్టీఆర్ శత జయంతిని పురస్కరించుకొని ఆ బ్యానర్ను నందమూరి బాలకృష్ణ లాంఛనంగా ఆవిష్కరించారు. 'తండ్రి తర్వాత తండ్రిలాంటి సోదరుడు జయకృష్ణ.. అమ్మానాన్న పేర్లు కలిసి వచ్చేలా బ్యానర్ పెట్టడం ఆనందంగా ఉంద'న్నారు. ఎన్టీఆర్కు చైతన్య కృష్ణ చాలా ఇష్టమైన మనవడని, ప్రేక్షకుల అభిమానాన్ని పొందాలని మనసారా ఆశీర్వదిస్తున్నట్లు తెలిపారు. ఈ చిత్రానికి వంశీకృష్ణ ఆకెళ్ల దర్శకత్వం వహిస్తున్నారు.
NBK 107 new poster: అఖండ ఘన విజయం తర్వాత బాలకృష్ణ నటిస్తున్న 107వ చిత్రం జోరుగా చిత్రీకరణ జరుపుకుంటోంది. గోపీచంద్ మలినేనిదర్శకత్వంలో మైత్రీ మూవీ మేకర్స్ ఈ చిత్రాన్ని నిర్మిస్తోంది. ఇప్పటికే 40 శాతం చిత్రీకరణ పూర్తి చేసుకుంది. ఎన్టీఆర్ శత జయంతి సందర్భంగా ఆయనకు నివాళులర్పిస్తూ చిత్ర బృందం ఎన్బీకే 107 చిత్రానికి సంబంధించి కొత్త పోస్టర్ను అభిమానులతో పంచుకుంది. టెంపుల్ బ్యాక్ డ్రాప్లో రక్తంతో నిండిన కత్తిపట్టుకున్న బాలకృష్ణ ఉగ్రరూపంలో కనిపిస్తున్న పోస్టర్ సినిమాపై భారీ అంచనాలను పెంచేలా చేస్తోంది.