టాలీవుడ్లో ఈ మధ్య కాలంలో ఎక్కువగా వినిపించిన పేర్లు సీనియర్ నటుడు నరేశ్, నటి పవిత్ర లోకేశ్. గత కొన్ని నెలలుగా వీరి వ్యవహారం ఇండస్ట్రీలో చర్చనీయాంశమైంది. ఇద్దరూ డేటింగ్లో ఉన్నారని, త్వరలో పెళ్లి చేసుకుంటారనే వార్తలు వస్తూనే ఉన్నాయి. ఇటీవల నరేశ్ విడుదల చేసిన వీడియో చూసి వీరిద్దరూ నిజంగానే మళ్లీ పెళ్లి చేసుకున్నారని అంతా అనుకున్నారు. అయితే తాజాగా నరేశ్ రిలీజ్ చేసిన ఓ పోస్టర్ చూస్తే.. మొన్న జరిగింది పెళ్లి కాదా? అని అనిపించక మానదు!
ఇటీవలే నరేశ్-పవిత్ర లోకేశ్ కలసి ఓ సినిమాలో నటించారు. అదే 'మళ్లీ పెళ్లి'. తాజాగా ఈ సినిమాకు సంబంధించిన గ్లింప్స్, ఫస్ట్ లుక్ పోస్టర్ను విడుదల చేశారు నరేశ్. ఇందులో పవిత్ర ముసిముసిగా నవ్వుతూ ముగ్గు వేస్తుంటే.. నరేశ్ కొంటెగా చూస్తున్నట్టు కనిపిస్తోంది. ప్రస్తుతం ఈ పోస్టర్ సోషల్ మీడియాలో వైరల్ అవుతోంది. దీంతో నెటిజన్స్ రకరకాలుగా కామెంట్లు పెడుతున్నారు. నరేశ్ పెట్టిన పెళ్లి వీడియో కేవలం సినిమా పబ్లిసిటీ కోసమా అంటూ ఆశ్చర్యం వ్యక్తం చేస్తున్నారు.
గతేడాది నరేశ్, పవిత్రా లోకేశ్ కలసి త్వరలో కొత్త జీవితం ప్రారంభిస్తున్నట్లు ఓ రొమాంటిక్ వీడియోను పోస్ట్ చేశారు. అంతే కాదు కొన్నిరోజుల తర్వాత నరేశ్-పవిత్ర ల పెళ్లి అయిపోయినట్టు ఓ వీడియోను నరేశ్ తన సోషల్ మీడియా ఖాతాలో షేర్ చేశారు. ఇది చూసి అంతా షాక్ అయ్యారు. దీంతో నరేశ్-పవిత్రల పెళ్లి అయిపోయిందని, హనీమూన్కు కూడా వెళ్లిపోయారని వార్తలు గుప్పుమన్నాయి. తాజాగా ఈ వ్యవహారం చూసి అంతా షాక్ అయ్యారు. ఇలా కూడా పబ్లిసిటీ చేసుకుంటారా అంటూ కామెంట్లు చేస్తున్నారు.
నరేశ్, పవిత్ర ప్రధాన పాత్రల్లో చేస్తున్న సినిమానే ఈ మళ్లీ పెళ్లి. ఈ సినిమాకు ఎం.ఎస్ రాజు దర్శకత్వం వహిస్తున్నారు. ఈ చిత్రాన్ని తెలుగు, కన్నడ బైలింగ్యువల్ సినిమాగా తీస్తున్నారు. ఫ్యామిలీ ఎంటర్టైనర్ మూవీగా సినిమాను తెరకెక్కిస్తున్నారు మూవీ టీమ్. సూపర్స్టార్ కృష్ణ భార్య విజయ నిర్మల మరణించిన తర్వాత ఈ బ్యానర్పై ఎలాంటి సినిమాలు చేయలేదు. ఇప్పుడు ఈ విజయకృష్ణ మూవీస్ బ్యానర్లో నరేశ్ 'మళ్లీ పెళ్లి' సినిమాను నిర్మిస్తున్నారు. ఈ సినిమా వేసవి కానుకగా థియేటర్లలోకి రానుంది.
