తెలుగు అగ్ర హీరోలంతా వెండి తెరపైనే కాదు.. బుల్లితెరపై కూడా మెరిసి ఔరా అనిపించారు. బాలకృష్ణ, చిరంజీవి, ఎన్టీఆర్, నాని, నాగార్జున వంటి స్టార్ హీరోలు పలు టీవీ షోలకు వ్యాఖ్యాతలుగా వ్యవహరించి అందరినీ అబ్బురపరిచారు. అలాగే ఓటీటీ ఫ్లాట్ఫామ్ వచ్చాక కూడా బాలకృష్ణ, రానా, సమంత, మంచు లక్ష్మి వంటి నటీనటులు హోస్టులుగా చేసి ప్రేక్షకులను మెప్పించారు. అయితే వీరందరిలో ఎక్కువ పేరు వచ్చింది మాత్రం బాలయ్యకే. అందులో ఏ మాత్రం అతిశయోక్తి లేదు. ప్రముఖ తెలుగు ఓటీటీ ఫ్లాట్ ఫామ్ ఆహా రూపొందించిన అన్స్టాపబుల్ షో రెండు సీజన్లకు హోస్టుగా బాలయ్య అదరగొట్టారు. బాలయ్య వల్లే ఈ టాక్ షో ఎంతంటి ఘన విజయం సాధించిందని చొప్పొచ్చు.
బాలయ్య తన మార్క్ ప్రశ్నలతో వచ్చిన అతిధులను ఉక్కిరి బిక్కిరి చేశారు. అయితే రేటింగే కాదు ఆహాకు సబ్ స్రైబర్లను కూడా పెంచిందీ ఈ షోనే. కాగా, అన్స్టాపబుల్ విత్ బాలయ్య షో రెండు సీజన్లు ముగిశాయి. ఈ రెండు సీజన్లలో టాలీవుడ్ హీరో, హీరోయిన్లు ప్రభాస్, మహేశ్ బాబు, పవన్ కల్యాణ్, రానా, నాని, అల్లు అర్జున్, రష్మిక, రాశిఖన్నా, రవితేజ, విజయ్ దేవరకొండ వంటి యాక్టర్లు ఎంటర్‌టైన్‌మెంట్ చేశారు. కేవలం బాలయ్య బ్రాండ్ ఇమేజ్‌తోనే ఈ షో పెద్ద హిట్ అయ్యింది. అయితే ఇప్పుడు మరోసారి బాలయ్య ఓటీటీలో సందడి చేయనున్నారు.
అయితే అన్స్టాపబుల్ సీజన్ 3 అనుకుంటే మీరు పప్పులో కాలేసినట్లే. బాలయ్యకు ఉన్న ఇమేజ్ను దృష్టిలో పెట్టుకుని ఆహా పకడ్బందీ ప్లాన్ వేసింది. మరోసారి బాలయ్యను మరో షో ద్వారా తీసుకు రానుంది. ఆహాలో ప్రసారం కాబోతున్న మ్యూజిక్ కాంపిటీషన్ షో ‘ఇండియల్ ఐడల్ సీజన్ 2 త్వరలో ప్రారంభం కాబోతుంది. ఇప్పటికే దీనికి సంబంధించిన ఆడిషన్స్ కూడా జరిగాయి. మొత్తం 12 మంది కంటెస్టెంట్లను ఎంపిక చేసింది. వీరి మధ్య పోటీ ఉండనుంది. తమన్, గీతామాధురి, కార్తీక్ ఈ ఆడిషన్స్ నిర్వహించారు. అయితే ఈ సీజన్ బాలయ్యతో ప్రారంభించేందుకు ఆహా స్కెచ్ వేసింది. ఈ 12 మందిని తెరకు పరిచయం చేసే బాధ్యతను బాలకృష్ణకు అప్పగించింది. ప్రస్తుతం దీనికి సంబంధించిన షూటింగ్ పూర్తి కాగా, దానికి సంబంధించిన వీడియోను ఆహా ట్విట్టర్ లో షేర్ చేసింది. ఇక బాలయ్య హోస్టు అయినా గెస్ట్ అయినా ఆ షో దద్దరిల్లాల్సిందే. అయితే బాలయ్య ఇండియన్ ఐడల్ సీజన్ 1కు కూడా వచ్చి సందడి చేశారు. తనదైన పంచ్ డైలాగ్లతో అందరినీ నవ్వించారు.
అఖండ, వీర సింహారెడ్డి సినిమాలతో వరుస సక్సెస్లను సొంతం చేసుకున్న బాలకృష్ణ ప్రస్తుతం అనిల్ రావిపూడి దర్శకత్వంలో సినిమా చేస్తున్న విషయం తెలిసిందే. NBK 108 అనే వర్కింగ్ టైటిల్తో రూపొందుతున్న ఈ సినిమాలో కాజల్ అగర్వాల్ హీరోయిన్గా నటించనుందట. కాగా, ఇటీవలే షూటింగ్లో శ్రీలీల పాల్గొన్నట్లు అధికారిక ప్రకటన వచ్చింది. బాలకృష్ణకు ఆమె కూతురు పాత్రలో కనిపించబోతున్నట్లు సమాచారం. ప్రస్తుతం వీరిద్దరితో సన్నివేశాల చిత్రీకరణ జరుగుతున్నాయట. వీరి మధ్య వచ్చే సెంటిమెంట్‌ సన్నివేశాలు సినిమాకు ప్రధాన ఆకర్షణగా ఉంటాయంటున్నారు. ప్రస్తుతం వేగంగా చిత్రీకరణ జరుపుకుంటున్న ఈ సినిమాని దసరా కానుకగా ప్రేక్షకుల ముందుకు తీసుకొచ్చే అవకాశాలున్నాయని తెలుస్తోంది. అతి త్వరలోనే చిత్ర టైటిల్ను ప్రకటించి..విడుదల తేదీపై స్పష్టత ఇవ్వాలని మేకర్స్ ప్లాన్ చేస్తున్నారు.
