'మిస్​ పర్​ఫెక్ట్'​గా మెగా కోడలు - అలా ఉంటే తనకు అస్సలు నచ్చదట!

Miss Perfect Lavanya Tripati : మెగా కోడలు లావణ్య త్రిపాఠి తాజాగా వెబ్​ దునియాలోకి మరోసారి ఎంట్రీ ఇచ్చారు. మిస్​ ఫర్​ఫెక్ట్​ అనే సిరీస్​లో ఆమె కీ రోల్​ ప్లే చేస్తున్నారు. తాజాగా ఈ సిరీస్​కు సంబంధించిన టీజర్​ను మేకర్స్ విడుదల చేశారు. ఆ విశేషాలు మీ కోసం

Miss Perfect Lavanya Tripati :ఇటీవలే టాలీవుడ్ మెగా ప్రిన్స్​ను పెళ్లాడిన లవాణ్య త్రిపాఠి ప్రస్తుతం 'మిస్​ పర్​ఫెక్ట్' అనే వెబ్​సిరీస్ ప్రమోషన్స్​లో బిజీగా ఉన్నారు. ఇందులో భాగంగా తాజాగా విడుదలైన టీజర్​ నెటిజన్లను తెగ ఆకట్టుకుంటోంది. అందులో లావణ్య మెయిన్​ లీడ్​గా కనిపించనుండగా, లైఫ్​ ఈజ్ బ్యూటిఫుల్ ఫేమ్ అభిజీత్​ కీలక పాత్ర పోషిస్తున్నారు. కుకింగ్ అంటే ఇంట్రెస్ట్ ఉన్న ఓ యువ‌కుడిగా ఈ వెబ్‌సిరీస్‌లో క‌నిపించ‌బోతున్నారు. సీనియర్ నటి ఝాన్సీ, 'అమృతం' ఫేమ్ నటుడు హర్షవర్ధన్, సునైనా, అభిజ్ఞ కూడా ఈ వెబ్​ సిరీస్​లో కీ రోల్స్​ ప్లే చేస్తూ సందడి చేస్తున్నారు. ప్రస్తుతం ఈ గ్లింప్స్​ నెట్టింట తెగ ట్రెండ్ అవుతోంది.

విశ్వ‌క్ కే ఖండేరావ్ డైరెక్ట్ చేసిన ఈ వెబ్ సిరీస్ ప్రముఖ ఓటీటీ ఛానల్ డిస్నీ ప్లస్ హాట్ స్టార్​ వేదికగా త్వరలో స్ట్రీమింగ్ కానుంది. విశ్వ‌క్ గతంలో 'స్కైలాబ్' అనే టాలీవుడ్ సినిమాను తెరకెక్కించారు. ఫుల్​ ఆన్​ కామెడీ మోడ్​లో ఉన్నట్లు టీజర్​ చూస్తుంటే అర్థమవుతోంది. ప్రతీ విషయంలోనూ పర్​ఫెక్ట్​గా ఉండే ఓ అమ్మాయి. అలా ఉండటం వల్ల ఎలాంటి పరిస్థితులను ఎదుర్కోవాల్సి వచ్చింది అనేది ఈ సిరీస్ సారాంశం.

ఇక లావణ్య కెరీర్​ విషయానికి వస్తే : "నాకు త్వరగా పెళ్లి చేసేయండి నాన్నా" అంటూ క్యూట్​గా అడుగుతూ 'అందాల రాక్షసి' సినిమాతో టాలీవుడ్​కు పరిచయమయ్యారు టాలీవుడ్​ బ్యూటీ లావణ్య త్రిపాఠి. తొలి సినిమాతో ప్రేక్షకులను అలరించి ఆ తర్వాత 'భలే భలే మగాడివోయ్‌' 'సోగ్గాడే చిన్నినాయనా', 'దూసుకెళ్తా', 'శ్రీరస్తు శుభమస్తు', 'రాధా', 'మిస్టర్'​,'అంతరిక్షం','చావుకబురు చల్లగా' సినిమాలతో తెలుగు అభిమానులకు మరించ చేరువయ్యారు. మెగా ప్రిన్స్​ వరుణ్​ తేజ్​తో ప్రేమలో పడ్డ ఈ చిన్నది ఇటీవలే ఇటలీ వేదికగా వరుణ్​తో మూడు ముళ్ల బంధంలోకి అడుగుపెట్టారు. ఇక సినిమాల్లోనే కాకుండా ఈమె టెలివిజన్ షోస్​ వెబ్​ సిరీస్​లోనూ సందడి చేసింది. గతంలో జీ 5 వేదికగా వచ్చిన 'పులి మేక' అనే వెబ్ సిరీస్​తో ప్రేక్షకులను ఆకట్టుకున్నారు.