Maheshbabu Sarkaru vari paata: 'ఎవడు కొడితే దిమ్మ తిరిగి మైండ్‌ బ్లాంక్‌ అవుతుందో.. వాడే పండుగాడు..' ప్రిన్స్‌ మహేష్‌బాబు. క్లాస్‌ అయినా, మాస్‌ అయినా.. ఆ పాత్రలపై తనదైన ముద్ర ఉండితీరాల్సిందే. బాక్సాఫీసు దగ్గర హడావిడి చేయాల్సిందే. ఇటీవల పరశురామ్‌ దర్శకత్వంలో 'సర్కారు వారి పాట' చేశారు. ఆ చిత్రం ఈ గురువారం ప్రేక్షకుల ముందుకొస్తోంది. ఈ సందర్భంగా సినిమా విశేషాలను ముచ్చటించారాయన. ఆ విషయాలు...
ఈ సినిమా చేస్తున్నప్పుడు 'పోకిరి' రోజులు గుర్తుకొచ్చాయని చెప్పారు మీరు. మీ చిత్రబృందం కూడా అదే మాట అంటోంది. కారణమేంటి?
'పోకిరి' అనేది మాస్‌ యుఫోరియాతో కూడిన సినిమా. అదే తరహా మాస్‌ అంశాలతో ఈ సినిమా ఉంటుందీ. అలాంటి షేడ్స్‌ ఉన్న పాత్ర దొరకడంతోనే 'పోకిరి' రోజులు గుర్తుకొచ్చాయని చెప్పా. దీని క్రెడిట్‌ అంతా దర్శకుడికే చెందుతుంది. నా హావభావాలు, సంభాషణలు చెప్పిన విధానం చాలా బాగుంటుంది. పాత్రని చాలా కొత్తగా డిజైన్‌ చేశారు. ప్రతీ నిమిషం ఆస్వాదిస్తూ చేశా.
నటుడిగా ఇలాంటి పాత్రలు చేయడంలో ఉన్న సౌలభ్యం ఏమిటి?
ఒక కథకి ఏం కావాలో అదే చేస్తాను. దాన్నుంచి బయటికి రాను. ఏ కథయినా సరే, దానికి తగ్గట్టే నటన ఉండాలనుకుంటా. 'సర్కారు వారి పాట' కథ, ఇందులోని పాత్రలు వేరు. హద్దులు లేకుండా మరింత ఫ్రీగా ఇలాంటి పాత్రలు చేయొచ్చు. నాలుగేళ్లుగా నా ప్రయాణం అద్భుతంగా సాగుతోంది. ఈ సినిమా మరింత కొత్తగా ఉంటుంది. అభిమానులతోపాటు అందరికీ నచ్చేలా ఉండాలి సినిమాలు. బడ్జెట్‌లు పెరిగాయి. ఇప్పుడు ప్రయోగాలు కూడా చేయలేం. ఇలాంటి సినిమాలు తప్పకుండా ప్రేక్షకుల్ని అలరిస్తాయి.
ఈ సినిమా ప్రయాణం ఎలా సాగింది? కరోనా సమయంలో కథలో మార్పులు, చేర్పులేమైనా చేశారా?
కథ పరంగా కాకుండా 'మ మ మహేషా..' పాట విషయంలోనే కొంచెం మార్పు చేశాం. మొదట వేరే పాట అనుకున్నాం. సినిమా చూసుకున్నాక ఓ మాస్‌ పాట ఉంటే బాగుండేదనే అభిప్రాయం కలిగింది. దాంతో మొదటిదాన్ని పక్కన పెట్టి పది రోజుల వ్యవధిలో మ మ మహేషా పూర్తి చేశాం. ఇక సినిమా ప్రయాణం అంటారా? కరోనా వల్ల చాలా క్లిష్టంగానూ, అదే సమయంలో కొత్తగానూ అనిపించింది. ఏ సినిమా అయినా కూడా ఏడెనిమిది నెలల్లో పూర్తి చేసేస్తాం. కానీ, దీనికి రెండేళ్లు ప్రయాణం చేశాం. మానసికంగా శారీరకంగా చాలా కష్టంగా అనిపించింది. ఈ విషయంలో నిర్మాతలకి కృతజ్ఞతలు చెప్పాలి. 'దూకుడు', 'శ్రీమంతుడు'ల నుంచి వాళ్లతో కలిసి ప్రయాణం చేస్తున్నా.
గత సినిమాలతో ఓ బలమైన అంశాన్ని చెప్పారు. మరి ఈ సినిమాతో?
ఇందులో కొత్తగా ప్రయత్నించాం. దాన్ని తెరపై చూసి ఆస్వాదించాలంతే. దర్శకుడు ఈ కథ చెప్పినప్పుడు నన్ను ఆత్రుతకి గురిచేసిన విషయం అదే. పరశురామ్‌ రచనలో దిట్ట. దర్శకుడు రచయిత కూడా అయితే ఆ ప్రభావం వేరుగా ఉంటుంది. ఈ సినిమాని ప్రేక్షకులు మళ్లీ మళ్లీ చూస్తారు. నాకూ, కీర్తికీ మధ్య సాగే లవ్‌ ట్రాక్‌ చాలా బాగుంటుంది. తమన్‌ సంగీతం బాగా కుదిరింది. తను ఇప్పుడొక సంగీత సంచలనం. ప్రేక్షకులకి ఏ పాట నచ్చుతుందో తనలో చాలా స్పష్టత వుంది. కళావతి పాట ఇచ్చినప్పుడు మాకు మొదట అంత తొందరగా నచ్చలేదు. 'నన్ను నమ్మండి, మహేష్‌ కెరీర్‌లోనే ఒకానొక అత్యుత్తమమైన పాట అవుతుంద'ని చెప్పారు. అదే జరిగింది. నాకు ఇష్టమైన పాట కూడా అదే. సముద్రఖని నటన కూడా ఆశ్చర్యపరుస్తుంది.
ట్రైలర్‌ చూస్తే కొన్ని ఘాటైన సంభాషణలు సినిమాలో ఉన్నాయనిపిస్తుంది. అవి చెబుతున్నప్పుడు సెట్లో మీకేం అనిపించింది?
ఆ పాత్ర నడవడిక అలా ఉంటుంది. నేను స్క్రిప్ట్‌కి లొంగిపోయి నటిస్తా. పాత్ర డిమాండ్‌ చేసినప్పుడు అలాంటి సంభాషణలు చెప్పడానికి ఏమాత్రం వెనకాడను.