సూపర్ స్టార్ మహేశ్ బాబు మళ్లీ షూటింగ్లో బిజీ కానున్నారు. ఇటీవలే మహేశ్ తండ్రి సూపర్ స్టార్ కృష్ణ మరణించారు. అదే కాకుండా ఒకే ఏడాదిలో ముగ్గురు కుటుంబసభ్యులకు దూరమయ్యారు మహేశ్ బాబు. ఈ ఏడాది ప్రారంభంలో తన సోదరుడు రమేశ్ బాబు మరణించారు. అనంతరం తల్లి ఇందిరా దేవి పరమపదించారు. కాగా, ఆ బాధ నుంచి తేరుకుని తిరిగి పనిలో నిమగ్నమయ్యారు మహేశ్.
తాజాగా ఓ యాడ్ షూటింగ్లో పాల్గొన్న సూపర్స్టార్ను.. ఫొటోగ్రాఫర్ సురేశ్ నటరాజన్ క్లిక్ మనిపించారు. దాన్ని మహేశ్ తన సోషల్ మీడియా ఖాతాలో పోస్ట్ చేశారు. 'పనిలోకి తిరిగి వచ్చా.. మీతో పని చేయడం ఆనందంగా ఉంది' అని ఫొటోగ్రాఫర్ను ఉద్దేశించి రాసుకొచ్చారు. ఈ ఫొటోను నటరాజన్ కూడా షేర్ చేశారు. కాగా, ఆ ఫొటోలో మహేశ్ లుక్ అదిరిపోయేలా ఉంది. టీషర్ట్ మీద లెదర్ జాకెట్తో చాలా స్టైలిష్గా ఉన్నారు. ఇంత అందంగా ఉన్నారు కాబట్టే మిమ్మల్ని టాలీవుడ్ ప్రిన్స్ అంటారని ఫ్యాన్స్ కామెంట్లు పెడుతున్నారు.