'అల వైకుంఠపురంలో' వంటి బ్లాక్ బస్టర్ హిట్ తర్వాత డైరెక్టర్ త్రివిక్రమ్ తెరకెక్కిస్తున్న సినిమా 'ఎస్ఎస్ఎంబీ 28'. సూపర్ స్టార్ మహేశ్ బాబు, పూజా హెగ్డే జంటగా నటిస్తోన్న ఈ మూవీ షూటింగ్ గత కొద్ది రోజులుగా శరవేగంగా జరుగుతోంది. ఇందులో యువ కథానాయికగా శ్రీలీల కీలకపాత్రలో కనిపించనున్నారు. ఈ చిత్రంపై భారీ అంచనాలే ఉన్నాయి. దీని కోసం అభిమానుల ఎంతో ఆసక్తిగా ఎదురుచూస్తున్నారు. అయితే ఇదే సమయంలో షూటింగ్ సెట్లో దర్శకుడు త్రివిక్రమ్ క్రికెట్ ఆడుతున్న వీడియో ఒకటి వైరల్ అయిన సంగతి తెలిసిందే. షూటింగ్ విరామ సమయంలో సరదాగా ఇతర టీమ్ మెంబర్స్తో కలిసి ఆడుతూ కనిపించారు. ఇందుకు సంబంధించిన వీడియో సోషల్ మీడియాలో తెగ చక్కర్లు కొట్టింది. ఇక ఈ వీడియోలో రంగస్థలం మహేశ్ కూడా చూడొచ్చు.
అయితే ఒక్కరోజు గ్యాప్లోనే ఇప్పుడు మహేశ్కు సంబంధించిన వీడియో బయటకు వచ్చింది. ఇందులో మహేశ్ కూడా ఓ ఫామ్హౌస్లో పచ్చని చెట్ల మధ్య ఓ క్రికెట్ ఆడుతూ కనిపించారు. అయితే ఇది పాత వీడియో అని తెలుస్తోంది. ఇందులో మహేశ్ ఓ చిన్న బ్యాట్తో క్రికెట్ ఆడుతున్నారు. ఇది చూసిన నెటిజన్లు దీన్ని ట్రెండ్ చేస్తూ తెగ లైక్స్, కామెంట్స్ పెడుతున్నారు.